KRALENDIJK – Apesar ku di parti di RCN no a tende nada ofisial relashoná ku e desaroyo nobo di eliminá ZVK, fuentenan ku ta bon na altura ta menshoná ku fin di 2019, ZVK ta stòp di eksistí. Diferente organisashon ku ta traha huntu ku ZVK ya ta informá di e situashon ku entrante 1 di yanüari 2020 ta bin un organisashon nobo i ZVK ta disparsé. Entrante 1 di yanüari 2020 desishon ya ta tumá serka e ministerio di salubridat bienestar i deporte, ku lo lanta un direktorado nobo apart ku ta karga e nòmber “Zorg en Jeugd Caribisch Nederland “(ZJCN). E plan ta pa ZVK entrante 1 di yanüari ta hinká bou di e direktorado nobo menshoná. No ta konosí e motibu di e kambia drástiko, mirando ku ZVK ya ta eksistí mas ku 9 aña, for di despues di 10 di òktober 2010. Ta un realidat ku ZVK no tin bon nòmber serka kliente, kendenan konstantemente ta reklamá e forma ku ta trata nan. Spesialmente momentu di baimentu den eksterior pa trato médiko avansá. Aktualmente tin un disputa den korte entre ‘Zorg Groep BES’ i ZVK, despues ku ZVK a terminá e kontrato di trabou ku e tabatin ku ‘Zorg Groep BES’. Por tin diferente faktor ta hunga ròl ku Hulanda ta deseá pa desmantela ZVK. E motibu eksakto tras di e asuntu di desmatelashon di ZVK pa awor no ta konosí. Den seno di ZVK i Hulanda tin un diskushon kiko mester sosodé si ta mantené ku ZVK òf ta kambi’é entrante 1 di yanüari 2020 manera esaki ta plania. Notisia Live 99 FM ta sigui e desaroyo ku hopi atenshon.

Share This
error: Content is protected !!