Pa: Fittipaldi Pietersz

Un suidadano di e Bario di Rincon kende ta wòchimèn ta konta algu ku a sosodé kuné hopi tempu pasa.

“Un anochi dilanti Stadion Antonio Trinidat algu a strobami di pasa pa mi bai mi kas. Despues di a sali un fiesta e anochi di ‘San Pedro’ despues di 12’or di mardugá, mi a mira un kos i poko poko e tabata aserkámi i tabata bira grandi. Mi mester a bira bèk i no sigui pa kas. E tempu ei ta 2 palu di lus tabatin den e Bario, esta Cocorobi. Pues anochi no tabatin masha klaridat den e área. ora ta skur bo ta topa yen di kos straño. Loke mi a topa no tabata algu malu, mihó bisa spiritu malu. Si tabata kos malu e lo a hasimi daño. Awendia tin hopi klaridat di lus anochi i esaki ta skapabo di eksperensia kos straño, danki Dios.

Despues di 12’or ta ora di un otro alma, grandinan ta bisa. No tin hende mas riba Kaya i e mihó kos ku bo por hasi ta bai kas. Ku alkohòl den bo kurpa semper kos ta sosodé. Tin hende ta un temporada nan ta topa kos straño, nan ta mira kos manera e lus, esta loke nan ta yama salta. Loke bo ta mira ta esun malu, loke ta bon nunka bo ta topa kuné. Ora un hende ta bai muri bo ta mira su spiritu, sinembargo e no ta lagabo rekonosé. 

Si bo tin miedu, bo mes ta spanta bo kurpa. Un persona kende tin un spiritu fuerte kasi nunka ta mira un spiritu òf kos straño,”e wòchimèn a konta.

Si abo ta deseá di konta algu straño ku bo a eksperensia bo por tuma kontakto ku Fittipaldi Pietersz na number di telefon: 7905999 òf “Whats App.

Share This
error: Content is protected !!