KRALENDIJK – Yamada ta bai na pueblo di Boneiru pa uni den orashon ku tur kreyente ora klòk di misa bati tur 12’or di mèrdia den kadena di orashon pa pidi Dios via di Kristu Hesus Su miserikordia, bondat, sosten, liberashon, sanashon pa nos wòrdu aliviá di e malesa di viro di korona. Nos ta pidi Dios tambe pa kura esnan ku ta malu di e viro.

Na momentu ku klòk bati nos ta bai den orashon Angelus Domini (Angel di Señor):

Angel di Señor a anunsiá Maria.

I El a konsebí di Spiritu Santu

Mi ta kumindá Bo, Maria yen di grasia Señor ta ku Bo, Bo ta bendishoná denter di muhénan i fruta di Bo barika , Hesus ta bendishoná. Santa Maria, Mama di Dios, pidi pa nos pekadó, awor i na ora di nos morto. Amen.

Ata kria di Señor

Ku sosodé ku mi según Bo palabra.

Mi ta kumindá bo Maria ….

I verbo a bira karni.

I El a biba meimei di nos.

Mi ta kumindá Bo Maria…

Pidi pa nos, Santa Mama di Dios

Pa nos bira digno di primintimentu di Kristu

Laga nos resa

Nos ta pidi Bo, Señor, basha Bo grasia den nos kurason, pa nos, ku pa e anunsio di Angel, a konosé Enkarnashon di Kristu, Bo Yu por yega, pa Su Pashon i Krus na e gloria di Su Resurekshon.

Pa E mes Kristu, nos Señor.

Amen

Gloria na Tata i na Yu i na Spiritu Santu. Manera tabata na kuminsamentu awor i semper den tur siglo di siglonan. Amen (3x)

Requiem aeternam

Señor, duna nan sosiegu etèrno

i lus etèrno lusa pa nan,

pa nan sosegá na pas.

Amen.

V. Tur alabansa na Señor

R. Danki na Dios

Ta invitá nos parokianonan pa resa un santa rosario diariamente.

Vikario di Boneiru, pastor Santiago ta pidi pa nos sigui e instrukshonnan di outoridat di Boneiru.

Dios Su pas i sanashon

Share This
error: Content is protected !!