KRALENDIJK – Awe mi ke papia pa Fittipaldi Pietersz i no komo miembro di prensa. Gezaghèber Edison Rijna di Boneiru a papia ku miembronan di prensa i loke ami a tuma nota, el a ekspresá algun kos ku por bai otro pa loke ta trata prensa na Boneiru. Manera nos ta bisa el a deshogá su mes na prensa. Mi no ta bai defendé entre otro gezaghèber.  

El a menshoná e atardi entre otro tokante e preshon ku pueblo ta pone pa haña un informashon i rumornan ku ta sirkulá. Un kos ku a bin dilanti ta, si no tin nada partikular no tin niun motibu pa gezaghèber sali i splika komunidat. Pasobra tin miembro di prensa ta bisa ku ta pueblo ta pidi i nan tin ku hasi nan tarea komo prensa, pa puntra i haña kontesta pa informá pueblo. Hopi bia prensa ta hasi pregunta djis pa nan stèm bai den aire i sin kontenido. A keda bon kla menshoná ku loke gezaghèber di Boneiru a papia relashoná ku kasonan di ‘corona virus’ na Boneiru ku, no ta nada di atenshon, informashon a bini for di Kòrsou di e konosido DR. Izzy Gerstenbluth, ku hopi hende ta eila, pa bin Boneiru, pasobra ta un persona asina nos mester pa papia ku komunidat. Kòrda gezaghèber no ta dòkter. Ta informashon ku e haña di dòkternan, spesialistanan e ta trese pa pueblo. Otro kos si no tin niun kaso na Boneiru, no tin niun motibu pa gezaghèber papia ku pueblo. Papia kiko! No kompará Kòrsou i Aruba ku Boneiru! Nan tin un obligashon pa papia ku komunidat, no 1 bia pa dia, sinembargo diferente bia pa dia. Mi ta ripití Boneiru no mester tin motibu pa pániko. E 2 kisas posiblemente 3 kaso ku tin poko síntoma di vírùs di ‘corona’, ta bon kontrolá. Nos mester resa i gradisí Dios ku Boneiru milagrosamente a sali bon te awor, tokante e vírùs ku tin mundu dominá. Mi a lamentá ku no ta tur miembronan di prensa tabata presente pa nan a skucha. Hopi importante ta pa e miembronan di prensa ku no sa, prensa su tarea ta pa informá i eduká komunidat! No pa duna show. Tin kos ku komunidat ta puntra i komo prensa bo por kontesta un bes, sin mester hasi e pregunta, den e kaso aki serka gezaghèber di e isla. Otro kos stòp di eilu manera nan ta bisa, ku e vírùs no ta na Boneiru. Djis kòrda ku e vírùs ta dominá práktikamente tur parti di mundu i e persona mas sabi na mundu no por deskubrí algu ku ta dominá e vírùs. E kos mas importante awor ta keda leu for di otro. Mi ta finalisá bisando: Gosa di bida, sinembargo tin hopi pais i nos islanan den bisindario, Kòrsou i Aruba ku hende no por gosa di bida. Nos por bai laman, ora nos ta deseá, start outo kore Lora den kaya kuantu ku nos ke. Kiko mas nos ke awe ku mundu ta sufriendo? Tá realístiko. Pensa riba otronan pidi Dios pa pronto rekuperashon pa esnan infektá ku e vírùs, yuda i konsolá esnan ku e pèrdè diferente miembro di famia.  Potrèt ta ilustrá miembronan di prensa presente.

Share This
error: Content is protected !!