KRALENDIJK – 12 di mei 2020 ta dia internashonal di enfermeranan, Partido UPB kier a felesitá tur enfermeranan riba nan dia.

Aña 2020 ta pará den e marco como E aña ku mas atenshon a wordu duná na enfermeranan debi na e pandemia okashoná pa COVID 19. E tema pa e aña aki ta Un bos pa liderá kuido i pa ta salud. No obstante ku semper e trabou di enfermeria tabata unu respetá, awor aki mas ku nunka a bin rekonose e kontribushon enorme i invalorabel ku e enfermera ta duna diariamente na salubridat na nivel mundial.

Enfermeranan ta den e posishon uniko di por ta presente na inisio di un bida pero tambe na final di un bida. Di ta presente den dolor, angustia i tristesa pero tambe den momentu di alegria ,momentu di vense enfermedat i sonrie ku esperansa.

Enfermeranan ta forma aproksimadamente e mitar di tur trahadonan ku ta laborá den sektor salud. COVID 19 a pone nos rekordá kon vital e enfermera ta. Sin nan i otro trahadonan den salud nos lo no por gana ningun bataya kontra pandemia.

Enfermeranan ta esnan ku ta kuida pa nos durante enfermedat i pesei ta importante pa pensa ku nan ta e grupo ku tambe mester wordu kwidá. Rekonisimientu di e gran labor ku e enfermera ta hasi ta importante y esey por ser hasí no solamente di aplaudi pa e enfermero o enfermera pero garantisá ambiente di trabou sano, seguridad di e enfermera. Ademas nos no mester perde di bista ku e enfermera tambe ta un mama un tata un joe ku famia ku un bida fuera di su trabou komo enfermera. E enfermera ku ta lubida ora di regresa kas pa tog keda ku un ser den nesesidat i angustia. Ta enfermera hopi bes ta ensera entrega hopi di bo mes pa bienestar di e otro.

Pesei enfermeranan, UPB kier extende na kada un di boso e mehor deseonan pa awe, nos ta pidi Dios su bendishon ta riba boso y e bunita trabou ku ta ser hasi pidiendo Dios sigi duna boso animo, forsa, pasenshi, pa por sigi kumpli ku e trabou bunita di ta un enfermera. Pabien!

Share This
error: Content is protected !!