KRALENDIJK – Djasabra 9 mei 2020 último diputado Elvis Tjin Asjoe a bishitá Punta Blancu Farms N.V. Durante e bishita aki señor diputado a kombersá ku e dirigentenan di Punta Blancu Farms N.V. ku ta Edwin Emerenciana, Anthony Emerenciana i señora Nadine Emerenciana.

Punta Blancu Farms N.V. ta un kompania Boneriano ku dia 22 april 2020 último a selebrá su di 66 aña di eksistensia.
E kunuku aki a krese fo’i un par di galiña pa un empresa di produkshon lokal ku ta akapará 27.000 galiña. Punta Blanku Chickenfarm ta responsabel pa produkshon di masoménos 12 mil webu diario.
Banda di ku e empresa familiar Boneriano aki ta traha huntu komo famia, tambe ta duna trabou na 8 trahadó fiho ku un salario na òrdu tur fin di luna. “Stagiairenan”di “Voortgezet Speciaal Onderwijs”ta kore trayektonan di práktika i tambe tin trahadó supsidiá pa gobièrnu di Boneiru ku ta hasi bon trabou den “zorgtraject.”

Toko, tienda i supermerkadonan tur renombrá awendia ta bende webu di e produktor Boneriano aki. Tambe e kasnan di famia lokal kaminda e mamanan ta lora man por ta sigur di por konta riba yudansa di webu tur luna pa por traha kosnan di boka dushi pa mantené nan famia.
Punta Blancu Farms N.V. ta un kompania ku ta traha ku vision i organisá pa por sirbi Boneiru tur dia di nobo.

Nos ta orguyoso di mira kon nos propio hendenan por i ta logra hasi kosnan grandi pa Boneiru, pabien !

Share This
error: Content is protected !!