KRALENDIJK – Suidadano Arthur Sealy den un komunikado pa prensa ta bisa: mi ta ripará ku na Bonaire no tin diskushon riba e tópiko; kiko ta bai pasa despues di Coronavirùs. E palabra mágiko a bira “normal nobo” pero kiko e ta, niun hende no sa. Un kos ta sigur Covid-19 a inisiá un guera sosial unda e distansia sosial ta bai bira mas grandi entre élite ku tin trabou i salario gordo i e masa ku ta bai konosé desempleo i mas pobresa.

Turismo no ta bai keda e úniko pilá di Bonaire su ekonomia. Hotèl, taksista, restorant, kompanianan di buseo, tienda di souvenir, marshe den Parke Wilhelmina ta bai konosé ménos entrada ku konsekuensia; retirá trahadó i asta dal porta di nigoshi sera. Masterplannan manera: Destinashon blou, Turismo, Akuerdo atministrativo mester di un revishon.

Sentral den e era nobo gobernantenan tin ku kambia di pensamentu i laga arogansia i set pa poder un banda. Tin ehèmpel di esaki. Den reunion di Konseho Insular di 14 di mei 2020, diputadonan no tabata di akuerdo pa tene nan mes na e tempu palabra i unu asta a mustra den e direkshon ku e no ta bini Konseho Insular mas pa duna kuenta i rason.Diputado Tjin Asjoe a demostrá ku tur e kursonan di liderazgo ku su partido a organisá tabata un frakaso.Konseho Insular, apesar ku tin tres frakshon ku diferente ideologia, ta pa kontrolá Kolegio Ehekutivo i no por aseptá e manera grosero di e diputadonan. Esaki no tin nada di aber ku ideologia polítiko, ta un bòfta den den kara di nan doño di trabou. Konseho Insular, si e ta respetá su mes, tin e obligashon pa kuestioná den un reunion públiko e aktitut bochornoso di e diputadonan. Pa evitá un konfrontashon ku Konseho Insular diputadonan tin e obligashon pa públikamente pidi pueblo despensa. Den e era nobo mester di lidernan ku vishon, teniendo kuenta ku konsekuensianan di Covid-19.

Awor ta momentu pa enfatisá; enseñansa, agrikultura, kultura, salubridat públiko i desensia. Komo historiadó mi no tin solushon pa un problema médiko, pero por tene un spil dilanti di komunidat i hasi pregunta kritiko pa nos realisá ku faktornan sosioekonómiko, polítikoi konvikshon kultural ta di gran importansia den e guera kontra un pandemia. Esaki mi ke laga pueblo di Bonaire mira.

Arthur sealy .

Share This
error: Content is protected !!