KRALENDIJK – Habitantenan ta pidi gobièrnu yudansa i duna atenshon riba kaya Nikiboko nort, spesialmente e área pegá ku entrada di Amboina/kaminda Yato bako. Tin hopi aksidente último tempu riba e kaya menshoná. Un habitante di e kaya a konta Radio Live 99.9 FM, ku aña pasá no ménos ku 4 bia outo a kibra su kurá di kas. Motibu di e aksidentenan tin di aber ku for di dia a drecha kaya Nikiboko Nort, vehíkulonan ta kore ku velosidat haltu riba e kaminda. Esaki sigur ta un di e motibunan ku tin hopi aksidente ta tuma lugá riba e kaya. Mester bini ku algu pa dominá e shofùr, i oblig’é kore ku ménos velosidat riba e kaya. Kisas por pensa pa konstruí drèmpel na sierto parti di e kaya, loke ta pone ku no por kore ku velosidat haltu riba e kaminda. E velosidat di e vehíkulonan manehá pa e shofùr, ta krea pániko pa e hendenan ku ta kana kantu di kaminda pa bai un sitio pa otro. No lubida ku riba e kaya aki tin diferente kas, bar, restorant, supermerkado i punta di hanchi unda outo nan por bula sali bo dilanti. Na final di kaya tin asta un skol básiko.

Un otro habitante di e kaya a konta Radio Live 99.9 FM ku el a aserká gobièrnu i e departamentu konserní varios bia pa buska solushon pa e situashon. ”Outo a kibra mi kurá i kore bai. Tin bes nan no tin seguro òf mester kana un kaminda di krus pa por drecha bo kurá bèk” e habitante a konta. Algun dia pasá un pikòp a dal dos buriku pareu i mata tur dos den un tiru. Bo no por drumi trankil komo ku outo ta dal den bo kurá un ora pa otro i nos ta teme ku un dia outo por dal i drenta den nos kas. No papia mes di trùknan i otro ekiponan pisá ku ta kore mas duru ku lei ta pèrmití den ‘bebouwde kom’. Nos ta spera e informashon por yega na esnan konserní, i ku nan ta asumí nan responsabilidat, e hendenan a bisa. 

Kombinashon di potrèt ta algun aksidente di tráfiko ku a tumá lugá riba e kaya ariba menshoná.

Share This
error: Content is protected !!