KRALENDIJK – Favell Maduro a presentá su mes na prensa, komo hefe nobo di e departamentu di Komunikashon i Protokòl di gobièrnu di Boneiru. Na e okashon diputado Elvis Tjin Asjoe a dirigí algun palabra promé ku a laga e hefe nobo di departamentu di komunikashon i protokòl dirigí su mes na prensa.

“Ya pa un tempu no tabatin un hefe di e departamentu ariba menshoná, miéntras Loeki Nicolaas tabata okupá e funshon komo hefe interino. Awor Maduro ta okupá e funshon pa kontinuashon.

Esaki a sosodé kaminda tabatin un kantidat di persona ku a reakshoná riba e vakatura i Maduro a sali e mihó kende a keda skohé, “tabata entre otro puntonan ku diputado a menshoná e mainta. No tabatin Boneriano ku a solisitá pa e funshon, pues a skohe un persona lokal for di Kòrsou ku kapasidat pa dirigí e departamentu.

Maduro a papia i a duna un splikashon kon el a tuma e desishon pa bin biba Boneiru pa e reto nobo komo hefe ya menshoná. “Mi no a duda niun momentu pa bini Boneiru. Mi stima e isla hopi. Huntu nos tin ku yega na e meta pa informá komunidat. Ta importante pa nos islanan ruman ta den union. Awor tin hopi kos mas, esta ret sosial, loke ántes no tabata eksistí. Solamente tabatin televishon, korant i radio. Awendia ta hopi mas amplio kon e hende por tuma nota di informashon, entre otro ‘Facebook’. Mi ke tin bon kontakto ku prensa. Nos ta un grupo di 6 persona i ku plan pa algun mas pa e tim ta kompletu. Trabou tin i nos no ta sinta ketu pa kontinuá i informá komunidat pa medio di prensa, “e hefe nobo di komunikashon a menshona.  

Share This
error: Content is protected !!