KRALENDIJK – Awe mainta den e programa Brunch99 na Radio Live 99.9 FM, Daisy Coffie miembro di frakshon di partido MPB a papia tokante e karta ku su partido a dun’é, pa inform’é ku e no ta lider di frakshon mas pa MPB den konseho insular.

Coffie: ”Durante di mi ousensia den konseho insular pa motibu di tratamentu médiko na Hulanda, mi tabata den kontakto ku mi koleganan di partido ku regularidat. Sierto momentu nan no tabata manda bisami nada pa motibu ku nan no tabata ke kansami debí na mi salú. Mi a bisa nan ku mi ta bon pa atendé ku e funshon apesar di ta leu. Momentu ku mi no por sigui ku e tarea, lo mi bisa. Mi no tabata malu pa muri, pues mi por ehersé e trabou. For di luna di yanüari mi no ta haña informashon manera mester ta for di partido MPB.  Tur hende por tabata den kontakto ku mi persona, si nan ta deseá.

Bèrdat na luna di yanüari, lider di partido Elvis Tjin Asjoe a bishitami na Hulanda loke mi ta apresiá. Na diferente okashon mi a keda pidi pa nan pa informámi, sinembargo e kos a keda pober. E asuntu di komunikashon den partido MPB ta suak, no awor, sinembargo ya pa hopi tempu. Mi a informá hendenan di partido na luna di yüli ku mi resultadonan ta mustra ku mi ta bon i ku na luna di sèptèmber mi ta regresá Boneiru. Mi deseo tabata pa mi a yega Boneiru pa reunion solèm riba dia di Boneiru. Debí ku mester a pasa e tèst di COVID-19, dia a bai lagami i mi a regresá Boneiru djadumingu 6 di sèptèmber atardi.

E djaluna siguiente mi a topa i papia ku lider di partido. Nos a papia riba diferente kos, hopi di nan ya e tabata sa pasobra mi a bis’é promé ku mi a bini Boneiru. E djamars despues di a papia ku Elvis djaluna, Elvis i Din Domacassé a presentá serka ami na kas, i a bisa ku nan ta aki, pasobra direktiva a tuma e desishon pa pone un lider di frakshon nobo debi na situashon di mi salú. Nan a bisami ku nan a tuma e desishon i no ta kambia di e desishon. Mi a bisa nan ku no por tuma un desishon asina, sin ta na altura tokante mi situashon di salú. Mi a bisa nan mi ta haña ku ta straño kon nan a papia di mi salú, sin ku a konsulta nada ku ami. Mi ta hopi mal kontentu i ta haña ku ta falta di rèspèt e forma ku MPB a ekspresá p’ami. A atendé kos tras di mi lomba i awor ta papia manera tabatin kombersashon ku ami persona.  

Mi a informá votadónan di e situashon aktual, ku partido MPB no a tratami korektamente. E pregunta kardinal ta: mi ta pertenesé na e grupo aki? Tokante e asuntu ku mi a topa Clark Abraham na Hulanda, si tabata sospechá ku tabata tin algu malu tokante esaki, mester a puntrami. Mi ta hende di tur hende i ta topa i saka potrèt ku tur hende.

E asuntu ku Elvis a pidimi na diferente okashon pa entregá mi asiento, tampoko no ta bèrdat. Niun bia el a pidimi pa entregá mi asiento. Nunka promé esei a sosodé. Mi tin hopi deskonfiansa den partido MPB. Mi tin algu den mi mente i mi ta bai sinta ku mi tata Walter Coffie ku ta mi konsehero, promé mi tuma un desishon. Mi ta kere pa mas tarda djaluna, mi tin un desishon kiko mi ta bai hasi, esta e kaminda ku mi ta skohe. Na Hulanda na kaminda pa Boneiru mi a bisa: Mi ta bai Boneiru i ku hopi gana pa traha pa e pueblo di Boneiru, ku hopi spit den konseho insular. Mi tei sigur pa tur esnan ku a vota pa mi representánan.”  

 

Share This
error: Content is protected !!