KRALENDIJK – Kondekorashon ‘Papal’ pa promé bia na Boneiru pa tres parokiano fiel ku a hasi hopi pa iglesia katóliko. Ta trata di Imelda Soleano-Albertus, Federica ‘Mamita’ Silberie- Soleana i Maria Anna ‘Marichi’ Frans-Schermer.  

Fin di siman tras di lomba tabatin un selebrashon grandi i importante, kaminda a kondekorá tres persona. Nan a risibí kondekorashon ‘Papal’. Papa Fransisco a otorgá e krus di merito ‘Pro ecclesia et Pontifice’, un kondekorashon ku ta esun di mas haltu, pa e parokianonan di La Bírgen di Coromoto. Pa promé bia den Diosesis di Willemstad, tres persona ta risibí e kondekorashon ‘Papal’. Ta trata di un rekonosementu hopi balioso.  

E selebrashon Eukarístiko a tuma lugá na parokia La Bírgen di Coromoto, riba dia ku a selebrá fiesta patronal: La Bírgen di Coromoto. Misa tabata afisiá pa 2 pader i 2 lèktòr akólito. Pader Alphonsus Baak i pader Ranulfo Goneda i lèktòr akólito Epifanio ‘Felix’ Nicolaas i Alejando Rodriquez. E rekonosementu a tuma lugá di sorpresa pa e kondekorando nan. Nan a keda inmensamente impreshoná, emoshoná dilanti di parokianonan presentá risibiendo nan mérito. Apesar ku nan edat ta haltu, nan ta traha i hasi hopi pa iglesia, kada un ku nan tarea. Padernan a dirigí palabra, for di karta ku nan a risibí relashoná ku e Kondekorashon ‘Papal’. Ta trata di karta di Nunsio di Italia, Obisbu Luis Secco i pader Andres for di Aruba. Danki pa nan trabou di hopi aña pa iglesia i e ta ehèmpel pa otronan. 

????????????????????????????????????
Share This
error: Content is protected !!