KRALENDIJK – Fin di siman tras di lomba tabatin un kaso di problema, kaminda a detené Maria Rivera, loke e ta haña tabata inhustamente. Relashoná ku e problema, Rivera ta konta Radio Live 99.9 FM awe, kiko a sosodé.   

Ta trata di un kaso ku tin un aña andando, esta for di òktober 2019.  “Un persona a akusámi ku mi ta molestiá e i su pareha pa medio di media sosial. Esaki no ta bèrdat 2019 nan a hasi keho na polis i mi a kai será pa esaki 5 dia den prison, i nan a lagami liber despues, pasobra no por a komprobá ku mi tabata kulpabel. Febrüari 2020 polis Li, ku ta polis di bario Antriol, a aserka mi persona na kas i puntra kiko ta e loke el a tende ku mi ta hasiendo. Mi a splik’é ku ya mi a kai será pa e kaso inhustamente i mi ta kla ku e asuntu. Dos siman pasa tanta di e persona ku segun e mi ta molesti’é, a bin na mi kas zundra hasi henter un problema. Mi no a yama polis pasobra el a papia i despues a bandoná e sitio rápido. Algun dia despues e tanta a bolbe presentá na kas, i mi ruman hòmber a tuma nota di e outo ku a presentá na kas. Un hende tabata flùit den e outo. Mi a sali pa wak ta ken, sinembargo e outo a somentá. Aki mi a bai polis e siguiente dia ku tabata 4 di sèptèmber. Polis no tabata ke a tuma e denunsia pasobra supuestamente e kaso ta habri,  i nan a bisa ku no tin sufisiente prueba pa nan tuma e denunsia. Mi a sali desapuntá bai OM. E persona apropiá no tabata presente i te dia di awe no a tuma kontakto ku mi persona. 8 di sèptèmber mi a bèl warda di polis pa papia ku polis Li. Mi no a hañ’é i a bèl Mark i a topa ku Belinda na Telefon. Nan a bisa ku ta trahando riba e kaso i momentu nan tin mas informashon, nan mes ta tuma kontakto ku mi persona. Djabièrnè 11 di sèptèmber mi a topa polis Li na Jos Bar. Mi a splik’é ku e hendenan ta keda buska mi persona problema te na mi kas i mi ke pa solushoná e asuntu aki. Niun hende no ke yudami i asina mi aktua tur hende sa kon pa drenta den kontakto ku mi persona. Polis Li a palabra ku e djaluna siguiente tur hende ta sinta huntu na mesa pa papia di e problema. Sinembargo djasabra e dia siguiente anochi, e problema a presentá kaminda e persona i su tanta a presentá na mi kas. Mi a filma nan presensia na mi kas pa mi tin komo prueba. Momentu mi a sali pafó di kas i a bisa nan no bin na mi kas bin buska problema, e tanta a purba baha for di outo. Aki mi a purba tene e porta di outo sera pa e no baha. Patras for di den e outo a baha un persona ku kapuchòn i ku algu den su man. Mi a sinti 3 impakto fuerte, 2 na mi banda links di kurpa i 1 patras di mi kabes. Mi yu muhé a sali pa yudami for di e situashon i aki i nan a dal e tambe ku palu den kabes i esaki tabata sangra meskos ku ami. Poko despues polis a presentá i a hasi uso di peper spray den kara di e yu. Na e momentu ei e yu tabata kore tras di esun ku palu i polis a laga e otro dama kore i a spùit mi yu, esta esun ku tabata na sanger i sin arma den man. Ami i mi yu a bai ku ambulans i e otronan ku polis. Despues ku nos a Sali for di hospital, nos a bai warda di polis pa hasi denunsia. Na warda di polis nan a bisa ku tin denunsia riba nos tambe pues ta detené nos. Nan a detené e yu debí ku el a resistí aresto kaminda esei no tabata e kaso. Nos a keda sera mas o ménos 17 ora i despues a rekobrá libertat. Nos ta haña e kaso aki por a bai hopi otro i awor ami a sali perhudiká . Mal trabou di polis a pone ku e kaso a yega te na loke a sosodé fin di siman tras di lomba. Mi ta rabia pasobra si e dosnan lo a bin mi kas ku arma, awe lo mi no tabata na e mundu aki mas. Mi ke trese esaki dilanti pa tur hende sa kiko a sosodé, kontrali na loke ta sirkulá den komunidat, ku ami ta e persona ku a okashoná e problema”, Rivero a bisa

Share This
error: Content is protected !!