KRALENDIJK—Radio Live 99.9 FM a papia ku gezaghèber Edison Rijna, kende ta presidente di konseho insular, relashoná ku e problema ku a surgi durante reunion. Gezaghèber Edison Rijna a konta kiko a sosodé ku a yega asina leu, ku e mester a pidi parlamentario Clark Abraham, kende no a komportá su mes, pa bandoná sala di reunion aya na pasangran. “E reunion tabata bai segun e punto nan di agènda. Tabatin algun punto di agènda pa atendé, i frakshon di partido Demokrat a presentá 11 tema. Tur kos tabata palabra segun e tempu stipulá. Tabatin miembro ku tabata usa e tempu pa kritiká otro kos, no solamente di e miembronan, sinembargo tambe di miembronan di kolegio ehekutivo. Nan tabata reakshoná riba otro kos i no tabata keda riba e kontesta di pregunta entre otro. Mi a pidi ámbos partido menshoná pa nan ta mas konsiso i efektivo riba e pregunta i kontestanan. Sierto momentu e situashon a bai un direkshon kaminda tabatin hisamentu di bos, i segun nos reglamentu di òrdu, komo gezaghèber mi a skòrs e reunion, i pidi e lidernan di frakshon pa bai ku mi persona den kamber di griffier. Aya nos a papia tokante kon e reunion ta bayendo i ku esaki no por sigui manera e ta bai. Solamente 2 lider di frakshon a bai kumi den e kamber apartá for di e sala di reunion. Mi a súplikanan ku mi no ta bai tolerá e asuntu di halsa bos i stroba e reunion pa kontinuá. Despues mi a purba papia ku Clark Abraham pa splik’é ku kos no por kontinuá di e forma aki, i e no a mustra interes pa skucha. A kontinuá ku e reunion, sinembargo Abraham a sigui den e mes un forma inkorekto. Mi a kita palabra for di dje i a pone ku pèrmit di sala di reunion, a pidié pa e bandoná sala. Esei a sosodé. Reunion a sigui sin presensia di Abraham i debí na e kòmbersashonnan no konsiso, no a logra repasá tur punto e anochi, loke mi a spièrta nan na diferente okashon. Puntonan ku no a keda trata no ta kla pa atentonan awor i lo hasi esei na su debido tempu. Pa loke ta trata e situashon di Abraham, e lo por kontinuá ku su presensia na reunion di konseho insular, i ta spera e komport’é, meskos ta e kaso ku tur otro mester duna rèspèt na esnan den sala di reunion, presidente di reunion di konseho insular”, gezaghèber Edison Rijna a bisa. 

Share This
error: Content is protected !!