KRALENDIJK– Bebedó di serbes sin eskrupulo riba krus na Seru Largu awe mainta. Un suidadano konosí den komunidat, awe mainta a aserka un reportero di Radio Live 99.9 FM, pa informá di 2 situashon ku no ta korekto. Un di nan ta e forma kon hende ta kana riba Seru Largu, esta nan no ta tene kuenta ku mester tene poko distansia for di otro. E hende ku ta kana òf kore ta kasi dal den e otro, esta esnan ku ta bin for di direkshon kontrali di e persona. Esaki ta sosodé mainta i atardi momentu ku hendenan ta kana, komo ehersisio riba Seru Largu. Ta bon pa pone atenshon i ta mas konsiente, spesialmente e temporada aki pa nos huntu evitá mas plamamentu di e konosido vírùs ku tin gran parti di mundu trastorná”, e persona a bisa. El a papia tambe tokante e situashon, kaminda probablemente djaweps atardi òf anochi un òf mas persona a subi bai serka di e krus riba Seru Largu i laga kantidat di bòter atras. “ Inkreibel pero bèrdat. Hende a hasi esfuerso pa subi e murayanan kaminda e krus ta riba seru Largu. Nan a sinta bebe nan barika yen di serbes, pa despues baha for di riba e muraya i laga kantidat di bòter di serbes atras. Djaweps mainta nan no tabat’ei, Pues esaki a sosodé djaweps atardi lat òf anochi”, e suidadano a bisa. Riba potrèt entre otro e sitio kaminda e bòter nan ta pone.

Share This
error: Content is protected !!