Luna di sèptèmber ta luna di kolekta di Stichting Prinses Wilhelmina Fonds Bonaire. E fondo ku genera pa medio di e kolekta aki ta bai pa konsientisá i informá e pueblo Boneriano tokante kanser. Por ehempel kon pa kuida e salu pa desminui e posibilidatnan di haña e malesa. Banda di esaki e ta yuda tambe pa organisá aktividat sosial i edukativo pa pashentnan ku e malesa ku ta registrá na Stichting Prinses Wilhelmina Fonds Bonaire. Apesar ku nos ta den situashon di medidanan relashona ku COVID-19, nos ke sigui ku e kolekta. Naturalmente teniendo kuenta ku e distansia sosial ku mester kumpli kune i tambe ku e situashon finansiero no ta meskos. Esaki ta trese kune ku mester adapta e sistema ku den añanan anterior tabata hasi esaki. E biaha aki nos ta hasi petishon pa tur donashon drenta via online banking of swipe machine. Ya nos a bishitá gezaghebber Edison Rijna, ku a hasi e prome donashon i tambe ta e prome persona ku a hasi uso di e sistema di swipe. E petishon ta bai na tur ku ke hasi un donashon, pa hasi uso di un di e sistema nan aki. Via banko Maduro & Curiel’s Bank (Bonaire) N.V. e number di kuenta ta 101.191.602 i via RBC Bank N.V. e number di kuenta 8400000180282769. Pa hasi uso di e swipe machine por pasa na nos ofisina na Kaminda La Union 11 ku ta habri djaluna, djarason i djabierne di 8.30 mainta pa 12.30 merdia. Danki di antemano pa kada donashon. Pa kualke pregunta i of informashon por tuma kontakto ku nos na 796 9798. Por sigui nos tambe via facebook.com/PrinsesWilhelminaFondsBonaire pa keda na altura di tur loke nos ta hasi i tambe diferente otro informashon. Direktiva di Stichting Prinses Wilhelmina Fonds Bonaire

Share This
error: Content is protected !!