KRALENDIJK – Robert Sances presidente di Sindikato ABVO sekshon Boneiru, a papia ku Radio Live 99.9 FM i entre otro a trese dilanti e situashon ku ta permití solamente 10 hende den misa, i 25 pa 30 mucha den un klas.  

“A presentá un situashon di prekupashon serka nos ku ta sindikato ABVO. Nos tin diferente miembro den sektor di enseñansa, tantu esnan ku ta duna lès i esnan ku no ta duna lès na skol. Ta konosí ku a informá tokante medidanan mas severo relashoná ku pandemia di ‘corona’ virus. Tin diferente medida spesialmente pa esnan ku ta den un edifisio sera. E medidanan ta nesesario. Mi no ta di akuerdo ku loke dòkter a menshoná. Mi tin un nietu ku no ta bai krèsh, pasobra e tin poko ferkout. E kos ta ku un klas di skol sekundario ta yen di mucha, 25 pa 30 mucha i kon ta tuma e distansia sosial? A pidi pa sera diferente negoshi, sinembargo tin hopi ku no ta kumpli ku e regla, ku tur e konsekuensianan. Nos no ta kontra e medidanan, sinembargo e no ta funshoná manera mester ta. Awe atardi nos ta reuní ku maestronan di skol pa papia. Diferente mensahe a yega serka nos ku nan punto di prekupashon. Nos a pidi maestronan di skol tuma un poko tempu pa nos tuma nota di e sitashon. Nos a manda e mensahe pa diputado Nina den Heyer i gezaghèber Edison Rijna tokante e prekupashon. Dependé e reakshon di diputado i gezaghèber riba loke nos a puntra, a base di esei ta sali na defensa di e miembronan de enseñansa. Mester wak e medaya di ámbos banda, pasobra e muchanan tampoko no ta tene nan mes na regla. Esaki ta responsabilidat di e mayor. Si e òrdu no sali for di ariba, skol ta kontinuá i muchanan mester bai skol i e dosentenan mester ta presente. Huntu nos tin ku sinta i wak e punto di atenshon. Un di e kosnan ku a pensa riba dje ta e parti virtual ku por hasi uso di dje. Tin e material pa por hasi esaki posibel. Ta kuida hendenan ku ta bai misa, i no lubidá ku muchanan tambe ta bai misa. Un misa asina grandi ta permití solamente 10 hende i un klas chikitu, ku 25 pa 30 mucha”, presidente di ABVO sekshon Boneiru a bisa.       

Entretantu gezaghèber Rijna i diputado den Heyer a reakshoná ayera atardi manera palabrá.  

“Awe djamars mèrdia ta bai tin un reunion ku kabesnan di skol. Ta trahando interno riba un protokòl kon pa aktua i kiko tin ku hasi pa evitá kasonan di ‘corona’ virus na skol entre otro. Si ta e kaso ku skolnan ta mihó prepará i tin regla estrikto si mucha òf dosente ta malu; esakinan no por bini skol. Si e situashon yega di tal forma ku tin kasonan na skol, por tuma pasonan pa sera skol. Desishon pa sera skol ta un desishon di gezaghèber abase di konseho ku e risibí di EBT.

Echo ta ku den nos afan pa atendé nos miembronan, a pone ku a aktivá empleadonan di GGD pa atendé e situashon di preokupashon i tambe duna informashon kon pa atendé i aktua. 

Un echo remarkabel ta: si laga sera skolnan pa un temporada, muchanan no ta keda kas, sino ta bai riba kaya. 

Di parti di ABVO nos tambe ke uni nos mes pa hasi tur loke ta na nos disponibilidat pa karga nos responsabilidat. 

 

Share This
error: Content is protected !!