Kralendijk [20 di sèptèmber 2020] – Después di algun siman intensivo ku preparashon nan pa e siman di turismo, Tourism Corporation Bonaire (TCB) ta tuma e desishon preventivo pa posponé i adaptá su aktividatnan. Riba 27 di sèptèmber 2020 ta selebra ‘World Tourism Day’ i pa konmemorá esaki TCB a prepará diferente aktividat durante henter un siman. E aña akí,
a plania e siman di turismo un tiki diferente kompará ku e añanan anterior. Kuminsando 19 di sèptèmber ku un ‘One-Hour Coastal Clean-up’ i pa terminá dia 26 di sèptèmber tambe ku un ‘One-Hour Coastal Clean-up’.
Durante e siman di turismo, TCB lo a demostrá prinsipalmente na nos hobennan, e importansia di turismo, no solamente pa e ekonomia di Boneiru pero tambe pa e komunidat. Algun di e aktividatnan ta; kompetensia di poema ku e tema “Turismo na Boneiru” i otorgamento di premio pa hoben di skolnan basiko, lansamento di e buki “Turismo na Boneiru, Bo Futuro!” i rekorido pa entrega e buki na skolnan básiko, ‘One Hour Coastal Cleanup’ durante “World Clean-up Day” i mas.

E aktividatnan menshoná ta ser posponé i lo ser evaluá despues di 30 di sèptèmber pa un fecha nobo. Tambe TCB lo a presentá un vidio edukativo demostrando e diferente ofishinan ku tin den e
sektor turistiko. E aktividat aki ta un aktividat virtual i a opta pa esaki si bai dor. E meta di e vidio ta pa e hobennan por mira kon nan por kombertí nan interes of hòbi den un profeshon den e sektor turistiko, den futuro.
TCB ta ekstende un invitashon na pueblo di Boneiru pa sigui nos riba nos paginanan di Facebook i Instagram na ingles “Bonaire Tourism” i na papiamentu “Tourism Corporation Bonaire”. Suskribí na nos “newsletter” via marketing@tourismbonaire.com, pa keda bon informá di tur desaroyo den turismo na Boneiru. Alaves TCB ta rekorda pa mantene distansia
sosial, husa tapa boka, laba man mas frekuente i sigi e informashon i anunsio di medida di parti di gezaghebber.

Share This
error: Content is protected !!