KRALENDIJK – E hóbennan biarista ku ta Janiro Chatlein i Marvin Abdul, ta pensando seriamente na drenta FeBiBo ku ta e federashon di biar di nos isla i tuma over.

E federashon bou di presidensia aktual di sr. Aaron Martis, a yama diferente reunion tratando na logra haña kandidatonan pa un direktiva nobo pero sin resultado. Un hende ta drenta un organisashon ku ideanan pa yuda un temporada, pero no mester t’asina si ku ta pensa o kere ku esaki ta pa restu di bo bida. Mester bini sangernan nobo pa tuma over.

Netamente den e kuadro di esaki, e dos hóbennan Janiro Chatlein i Marvin Abdul, a bin riba e idea pa bai duna un man den e federashon i hala tambe mas hóben pa bin yuda den e federashon. Janiro i Marvin den un entrevista ku boso Redaktor Deportivo Ibi Piar siman pasá, a duna di konosé ku nan ta pensando seriamente na bai duna un man i tuma over e federashon di biar.
E idea aki pa sanger nobo a kai den masha masha bon tera i lo haña tambe e koperashon nesesario pa logra esaki. Nan ta tratando na logra mas eksperensia promé ku nan tuma over. Nan tur dos ta bini di e dos konseheronan aktual di e federashon ku ta sr. Pèmpi Winklaar i sr. Ezzard “Ezzy” Semeleer.

Janiro a lanta siña hunga biar serka Pèmpi i Marvin serka Ezzy Semeleer.
Nan tin basta eksperensia pero ke logra mas pa momentu ku nan drenta e federshon, nan lo por hasi un bon trabou, loke ta spera di nan komo hóben.
Sigur nan lo sigui haña konseho di e dos konseheronan Pèmpi i Ezzy.
Nos ta spera ku pronto e hóbennan aki lo tuma desishon pa bai duna un man i pa despues tuma e federashon over huntu ku mas hóben ku tambe lo ke duna un man den e federashon. Nan lo haña sigur e koperashon, apoyo, sosten i e konsehonan nesesario pa guia e federashon manera sèmper den tòp.

Share This
error: Content is protected !!