Kralendijk – Henter e asuntu di pandemia i e forma kon rápido kasonan ta oumentando aki na Boneiru a kohe un rumbo sumamente preokupante. E último dianan aki gran parti di e atenshon ta riba e situashon na skolnan aki na Boneiru. Den komienso di siman tabata maestro- i trahadónan di skolnan a bosiferá nan preokupashon pa e echo ku ta tuma tur sorto di medida, siendo ku apesar ku tin un protokòl eksistente, tòg ta asina ku ta parse ku no ta tene kuenta ku e seguridat na nos skolnan. Sigur si tene kuenta ku klasnan ta di pròp ku alumno komo si fuera nada no ta pasando.

ABVO a haña te asta aserkamentu di mayornan ku ta preokupá pa salú di nan yunan. Sierto mayornan a opta pa tene nan yunan na kas pa motibu di miedu pa nan yunan no keda kontagiá pa e malditu vírùs Covid-19.

Den un forma arogante i chantagioso, direktornan di skol ta manda karta bisa ku yu ku no bin skol ta wòrdu konsiderá e asina yama “ONGEOORLOOF VERZUIM”. Siendo ku nos por nos por konsiderá di parti di mayornan ku ta interpretá esaki komo: “KOM NAAR SCHOOL EN VERPLICHT BESMETTEN

ABVO ta kondená e echo aki inmensamente kaminda ku mester por tin espasio pa buska un otro forma pa atendé ku henter e asuntu aki.

Un otro punto di preokupashon ta ku mayornan ku tin yu na krèsh tin ku tuma nan oranan di fakansi pa keda kas wak nan yunan.

ABVO ta konsiderá esakinan un echo no aseptabel. Enseñansa ta kai bou di Hulanda. Hulanda mester duna òrdu si tene na kuenta ku ya a bolbe bai kódigo oraño i ku te asta rueda di prensa a bolbe pasa den man di RCN. Esaki ta duna tur indikashon den ki direkshon nos ta bai. No ta bisa esaki ku hopi palabra, pero ta asina ta.

Gezaghebber Edison Rijna prudentemente ta sali duna kara, ku tur su bon intenshonnan, pero ta sierto desishonnan so ta den su man.

Nos yunan ta di nos i no di Hulanda. Ta nos tin ku sòru pa nos seguridat den e kasonan aki. ABVO ta apoyá tur medida pa kombatí e echo ku e vírùs ta sigui plama.

Enseñansa ta sumamente importante, pero no mas importante ku salú di hende.

Robert  Sances

Presidente ABVO Boneiru

Share This
error: Content is protected !!