KRALENDIJK – Komunidat ta responsabel pa tuma tur medida nesesario pa evitá ku coronavírùs ta sigui plama riba Boneiru. Esaki Nolly Oleana direktor di OCW a bisa resientemente. “Hopi pregunta tokante si ta nesesario pa sera skolnan si òf no. Si sera skol, e retraso ku tin di aya eskolar 2019 pa 2020, esaki lo oumentá i tin konsekuensia ireversibel.  Den e periodo di mart pa mei, e grupo di alumno vulnerabel a sufri un retraso formal. Ku alumno vulnerabel nos ta referí na e hóbennan ku tin problema sosial emoshonal, i no a risibí e guia nesesario. Nan tin problema ku komportashon i siñamentu. Nan mester di struktura i si nan no ta na skol, nan no ta risibí esaki. Esnan ku tin limitashon mental i físiko, tampoko a risibí e guia ku normalmente nan lo a haña.

E fenómeno di pobresa ku a oumentá, a pone ku esnan ku ta haña pakete di kuminda, no ta tur bia esaki tabata yega serka nan. Ku otro palabra tin un grupo ku nos a pèrdè for di bista, i ta nèt esnan ku mester di guia. Den tur situashon nos tei pa garantisá desaroyo i bienestar di tur hóben, no solamente un grupito. Nos lema di OZW ta: ‘Elk kind telt’. Segun ekspertonan, hóben bou di 17 aña no ta kontagiá otro fásilmente i ta haña síntoma leve  di COVID-19. Nan ta haña poko doló di kabes, doló di garganta síntoma di grip i keintura. Skol, maestro, i mayornan, bon mirá henter komunidat ta responsabel pa tuma tur medida di prekoushon, pa evitá ku coronavírùs ta sigui plama riba Boneiru”, Oleana direktor di OCW a bisa.  

Share This
error: Content is protected !!