KRALENDIJK – Boneiru tin alrededor di 3600 hóben ku ta kai bo di e lei di enseñansa obligatorio. Esaki ta loke Nolly Oleana, hefe di OCW a menshoná durante un konferensiá di prensa. 

”E otro personanan ku ta inskribí na otro instansianan manera entre otro ‘Fundashon Maridal Academy’, FORMA i otronan ku ta instituto edukashonal na Boneiru, ta pone ku nos ta surpasá e kantidat di mas ku 4 mil persona ku ta inskribí den un instituto i ta sigui formashon. Ta trata di un kinta parti di e poblashon di Boneiru. Tur mucha tin derecho riba enseñansa, i ta sumamente importante pa e studiante no tin retraso den nan estudio eskolar. Durante luna di mart último te na luna di mei, institutonan edukashonal na Boneiru a hasi tur esfuerso pa limitá e retraso den formashon di nos hóbennan. A bin ku diferente medida, i mi ta bai menshoná algun di e medidanan, pa evitá esnan ku ta sinta den banki di skol haña retraso. A apliká enseñansa riba distansia, i mayoria alumno, no tur, a keda kas, i a sigui lès den forma digital i e forma moderno pa e hóben ta den kontakto ku nan instruktor. Alumnonan di skol básiko no a hasi prueba final, esnan di grupo 8. Esaki a sosodé na Hulanda i islanan hermanan.  

Riba rekomendashon di hefe di skol, pa un programa den enseñansa avansá, ku e promesa pa kita e retraso mas rápido posibel. E idea tabata pa e alumno bai e aña eskolar nobo 2020-2021, i kita e retraso durante e aña eskolar. Alumnonan den enseñansa avansá, por a pasa nan pa un otro nivel di estudio sin pasa eksamen sentral.  Esaki a sosodé na Hulanda, Kòrsou, Sint Maarten i mas. Solamente un eksamen di e skol, a determiná si un alumno a slag si òf no. A introdusí loke nos konosé komo ‘zomer school’, den fakansi grandi na luna di yüli i promé siman di ougùstùs pa redusí a retraso den enseñansa. A eliminá loke nos konosé komo ‘proefwerkweek’.  

Den e periodo aki e personanan infektá ku coronavírùs tabata limitá. E retraso si tabata signifikante, i apesar ku a tuma tur e medidanan, no a logra kita e retraso kompletu. Nos tur sa ku no tin vakuna pa evitá ku e malesa ta sigui plama riba e isla”, Oleana a bisa.   

Share This
error: Content is protected !!