KRALENDIJK – Gezaghèber Edison Rijna a dirigí su mes djabièrnè tras di lomba na komunidat en konekshon ku medidanan relashoná ku COVID-19.

“Siman pasá djasabra mi a informá boso tokante e desishon ku Boneiru lo a drenta un ‘lock-down’ leve entrante 21 di sèptèmber, pa 10 dia. Mi ta realisá mi mes ku e medidanan ku a tuma tin hopi influensia riba tur habitante i empresario di Boneiru. No ta algu leve ora ku hopi kompania mester sera nan porta i ora ku dor di e kódigo oraño, turista no por bini e isla mas. Esaki ta toka tur hende.  

Nos a tuma e medidanan estrikto temporal, bou di bon konsiderashon i nan ta realmente nesesario pa redusí e plamamentu di e vírùs.  

Mi a nota ku mayoria habitante ta tene nan mes hopi bon na e medidanan pa loke ta trata e 1,5 meter di distansia i esnan di higiena. Mi ta orguyoso di esaki. Mi a ripará tambe ku esnan infektá ku e vírùs, ta ‘dùrf’ kompartí esaki riba medionan sosial. Esaki ta mustra sentido di responsabilidat di hendenan pa ku otro.  

E mayoria di kompanianan tambe ta tene nan mes na e reglanan i tin hopi solushon kreativo i inisiativanan a originá riba tereno empresarial. Esaki ta bunita pa mira, pasobra nos tur tin interes ora ku ekonomia di nos isla sigui drai. Pero nos mester ta realístiko i lamentablemente mester a tuma un paso patras, solamente despues nos por sigui padilanti ku otro.  

Ta te despues di dos siman por kuminsá mira efekto di e medidanan. Na promé instante nos a pone e medidanan pa dies dia pa asina prevení plamamentu mas aleu mas tantu posibel, i pa duna departamentu di salubridat públiko e oportunidat pa trese e infekshonnan na bista, pa asina despues nos por disidí mas dirigí kiko ta e mihó medidanan pa e temporada benidero.  

E siman tras di lomba hopi hende a ekspresá nan preokupashon tokante e tenementu di skolnan habrí. Mi ta komprondé e preokupashon aki, mi tambe ta mayor i ke protehá mi yunan mas tantu posibel. Mi ta komprondé ku tin preokupashon pa ku e seguridat di e dosentenan na skol tambe. E skolnan a duna di konosé ku nan a prepará nan mes den e lunanan ku a pasa, riba diferente posibel senario. I si nos wak e fuente di infekshon di COVID-19 na Boneiru, nos ta mira ku mayoria infekshon ta tuma lugá na trabou i di trabou a bai kas pa e famianan. Esaki ta nifiká ku te ku awor, e gran parti di infekshonnan ta bini for di esfera di trabou i relashonal, pues no di skolnan. Entre otro dor di esaki ta konsiderá tenementu di e skolnan habrí, un paso responsabel.   

Naturalmente tur hende ke sa kiko ta bai pasa djárason na final di e periodo di e ‘lock-down’ leve. Esaki partikularmente ta dependé di e kantidat di infekshon i e klùsternan konserní. Boso por ta sigur ku nos ta hasi tur kos posibel pa sòru pa, tantu na un manera rápido komo responsabel, suavisá e medidanan. Pa asina por duna habitantenan mas espasio pa move i pa empresarionan por haña e posibilidat di kuminsá ku nan negoshi atrobe. Pero esaki solamente ta posibel si, mirando for di nos responsabilidat pa ku Salubridat Públiko, esaki ta responsabel.  

Mi ke bolbe hasi un yamada na tur habitante di Boneiru, tene duru!  

Prinsipalmente den wikènt. Mi sa ku ta difísil, paso nos a kustumbrá di bai snèk òf Happy Hour, bini huntu ku famia òf pa traha afsprak ku amigunan, sinembargo awor di bèrdat no por hasi esaki, pa un ratu.  

Mi no por ripití sufisiente, e manera mas efektivo pa redusí e vírùs ta: tene e 1,5 meter di distansia, laba man i keda kas mas tantu posibel.  

Corona smart, ta huntu nos ta hasié.  

Pa tur informashon aktual por bishitá www.bonairecrisis.com i tur otro fuente di informashon di gobièrnu”, gezaghèber Rijna a bisa.   

Share This
error: Content is protected !!