KRALENDIJK – Mavis Abrahams, vise presidente di sindikato di Maestronan Boneriano (SIMABO), a bisa ku a papia ku direktor di SGB i e kombersashon no a bai bon.

“Nos tabatin un reunion virtual ku direktor general di SGB, Frans van Efferink, esaki relashoná ku e diferente dosentenan ku ta na kas i e studiantenan ku ta bai e parti di stazje, kaminda nan mester a keda kas den karentena. Nos no a sali satisfecho for di e reunion.

Di parti di SIMABO nos ta pensa, pa poulatinamente mirando kon e vírùs ta eskalá riba Boneiru, mester kuminsá na pensa kon pa bai sera skol. Kon ta bai hasié, nos no ta diskutí. Nos tin nos pensamentu kon ta bai hasié.  

No por kompará Boneiru ku otro paisnan ku si ta tene skol habrí. Na Boneiru nos ta hende ku konstantemente ta den kontakto ku otro. Mitar dia e dosente ta pas’é na skol huntu ku e muchanan. Nos ta un parti núkleo. Ku esaki mi ta referí, ku momentu e vírùs yega, e ta plama rápido den e unidat.

Nos a sigui tur konferensia di prensa, pasobra komo sindikato bo ta vigilá e proseso ku wowo di falki. Ta papia di retraso i mayornan ku ta sumamente prekupá. E dosente a bin dilanti, sinembargo solamente riba e parti di studia riba distansia. Niun momentu e atenshon a bai riba e dosente. E dosente ta ser humano i e tambe tin prekupashon i tin famia na kas. Na momentu ku bo disidí ku bo ta duna lès den klas, òf dunamentu di lès riba distansia, esaki no ta bai fásil.

Den promé parti ku e vírùs a presentá, a skohe diferente forma pa studia for di distansia. Studia riba distansia ta rekerí un preshon èkstra riba e dosente. E tin ku bai wak kua parti di materia e ta duna, si ta apto pa siña riba distansia. Tin kos ku ta difísil pa atendé riba distansia i esaki por ta un problema. Dosentenan ta bai tur tur pa e alumnonan. Sinembargo nan no ta superman i ta hende meskos ku tur otro. Hopi dosente i maestro no ta papia nan intrankilidat. Nan ta ekspresá e miedu ku nan tin serka un sindikato.

Asta mayor i studiante ta aserká nos i ta bisa ku e kos aki no por kontinuá den e forma ku e ta bai. Unidatnan a reuní i tin diskushonnan a tuma lugá, i no ta kla kon ta e mihó forma pa kontinuá. Nos a sali di e reunion i no ta kontentu. A manda un karta tambe pa gezaghèber di Boneiru Edison Rijna i diputado di enseñansa, kaminda ta trese nos prekupashon dilanti. Nos ke sinta huntu i yega na palabrashon, kaminda tur partido ta kontentu. Awor nos ta pendiente riba kontesta di e karta pa wak kon ta sigui”, Abrahams a bisa. 

Share This
error: Content is protected !!