KRALENDIJK – Union Sindikal Boneriano (USIBO) tin un posishon kla pa loke ta trata e pandemia di coronavirus, COVID 19. Na promé lugá nos ta rekonosé ku e vírùs ta eksistí i ku e ta un vírùs ku konsekuensianan ku por ta hasta mortal pa hende.. USIBO ta konsiente tambe ku outoridatnan lokal tin un deber i responsabilidat pa tuma tur medida apropiá pa evitá ku e virus ta plama riba nos isla i ku e por surpasá nos kapasidat pa atendé ku e vírus aki médikamente. E deber i responsabilidat aki ta tambe pa garantisá ku e kuido di salú regular por kontinuá ya ku salú i bida di kada siudadano ta importante i no solamente esun(nan) ku pega ku Covid-19. Sinembargo USIBO ta apoyá i sostené tambe ku mester tin un balansa entre e medidanan ku ta basá riba dato médiko di un banda, pero tambe ku ta tene kuenta ku e impakto ku e medidanan aki por tin desproporshonal pa loke ta nos bida soshal-ekonómiko. Ta ora e balansa aki ta lógiko i ku e medidanan ta sirbi e meta, nan lo por haña sosten di e gran mayoria di e komunidat. Otro manera ta konfushon ta krea i rebeldia.

Pa tal rason USIBO kier trese dilanti ku

1. Nos ta respetá e outoridat di tuma medida di parti di nos gezaghèber, un outoridat ku nos leinan ta duné, kon tal e no violá nos derechonan fundamental ankrá den nos konsitushon. Obediensia sivil na e medidanan tambe ta un deber di kada un di nos.

2. Nos ta respetá tambe ku nos representashon den Konseho Insular tin e outoridat di ratifiká e medidanan, semper i kuando nan ta resultado di un konsulta riba e impakto ku esakinan tin riba nos bida soshal-ekonómiko.

3. Nos ta di opinion ku mester desaroyá un maneho riba término largu, ya ku ta un echo establesé ku por lo pronto nos lo no ta librá di e Covid-19.

4. E ehekushon di e medidanan mester keda un responsabilidat di esnan pa kua e medida ta ser tumá.

5. E tumadó di medida (gezaghèber) mester perkurá pa e aparato di supervishon i kòntròl di e medidanan ta aktivo ku outoridat di traha prosès verbal i sankshoná violashon di e medidanan.

E forma ku aktualmente medidanan ta ser tumá ta salí for di e aspekto médiko di e problema, pero hopi biaha e medidanan ku mester sirbi e meta médiko no tin lógika i ademas no ta resultado aparentemente di ningun konsulta ku e sektornan pa kua e medida ta konta i no ta laga espasio pa esnan ku ta sufri e impakto, por bin ku formanan kreativo pa na un banda kumpli ku e meta médiko, i na e otro banda hasi ménos daño posibel na e bida soshal-ekonómiko di nos komunidat.

Share This
error: Content is protected !!