Kralendijk – Djamars algu pasá di 10’or di anochi, agentenan polisial di KPCN a tene un kòntròl riguroso riba un grupo di persona ku tabata dilanti Sentro di Bario Tera Kòrá na Kaya Monseigneur Nieuwindt. Motibu di e kòntròl tabata prinsipalmente komo ku a sinti holó fuerte di mariwana. Na momentu ku outoridatnan a yega, algun persona a trata di kore bai. A logra detené 2 persona na e sitio. Un hòmber di inisial G.J.M. di 27 aña di edat i un dama di inisial S.D.J.M. di 25 aña di edat. Tambe a konfiská droga i 1 arma di kandela. E detenshon nan aki no a bai asina fásil ya ku e hòmber sospechoso a resistí detenshon fuertemente. A surgi un forsageo entre e sospechoso i e agentenan polisial kaminda asta mester a atendé ku man duru. A konfiská tambe un vehíkulo bai warda di polis kuné pa mas investigashon. Pues 2 detenshon relashoná ku lei di Opio i lei di Arma BES, menasa i resistensia durante detenshon. Ambulans a presentá na warda di polis pa un chekeo médiko riba e agentenan polisial i un di e sospechosonan. E kaso ta sigui bou di investigashon.

FUENTE: KPCN/LIVEFM

Share This
error: Content is protected !!