KRALENDIJK – Serka kada persona ku detektá infektá ku COVID-19, ta hasi investigashon pa saka afó kon e persona a keda infektá ku e vírùs. Investigashon ta andando ta pa saka afó kon coronavírùs a yega Boneiru. Esaki ta loke Dòkter Marian Luinstra-Passchier di salubridat publiko a menshoná resientemente.

“Nos ta buskando pa sa kon e promé kaso ku a presentá na Boneiru. Echo ta ku e vírùs no a bula ku bientu i yega Boneiru. Coronavírùs a yega Boneiru pa medio di avion. Solamente nos no sa presis e dia, e persona i ku kua kompania di biahe. Nos ta purba pa yega na e informashon aki. Tabatin un kaso ku tabata konosí ku el a bini for di Kòrsou, miéntras tantu e kaso aki ta será. Sinembargo e promé kaso ku a presentá na Boneiru su fuente no ta konosí. E por a bini for di Aruba, Kòrsou òf Hulanda. E informashon ta balioso pa deskubrí kon e vírùs a yega Boneiru. Investigashon ta kontinuá pa determiná e fuente ku a kuminsá ku plamamentu di COVID-19 na Boneiru”, entre otro dòkter Luinstra-Passchier a bisa.   

Share This
error: Content is protected !!