KRALENDIJK – Daisy Coffie awor miembro independiente den konseho insular di Boneiru. Ayera Daisy Coffie a papia ku prensa, kaminda el a splika su posishon nobo i e motibu ku el a yega pa tuma e desishon. “Mirando desishon di partido MPB despues di a sinta huntu na mesa, un bia mas a keda demostrá ku desishon di partido, ta tuma sin konsulta ku mi persona. E direktiva ta intransigente pe a yega na e desishon. No a krea espasio pa un desishon hustu i rasonabel. P’ami e desishon unilateral aki, ta mustra klaramente ku e direktiva no tin konfiansa mas den mi. E karta ku mi koleganan di frakshon a manda pa presidente di konseho insular tras di mi lomba, ku ei tampoko tin konfiansa den mi. Argumentunan ku a kondusí na mi desishon ta bon pensa. Mi a tuma tempu pa analisá profundo. Mi a tuma konseho i a hasi esfuerso pa rekonsiliá ku un proposishon rasonabel i hustu. Finalmente mi a bisa tur e interesnan i a yega na un desishon ophetivo di prinsipio. Ya ku no tabatin mas espasio pa un rekonsiliashon, no a keda niun otro opshon pa informá partido ku entrante ayera 30 di Sèptèmber 2020, mi a tuma mi retiru komo miembro di MPB. Lo mi sigui den mi funshon komo miembro independiente di konseho insular di Boneiru, i kumpli ku mi responsabilidat na bienestar di pueblo di Boneiru en general. Mi lo ta miembro independiente di Konseho Insular, i ta sigui duna mi sosten na e gobièrnu, esta e kolegio ehekutivo aktual, por konta ku mi sosten, pa tur loke ta kumpli ku kriterionan di bon gobernashon i interes general i bienestar di  pueblo di Boneiru”,Daisy Coffie a bisa.

“Mi a sinta algun bia na mesa pa purba yega na forma pa kibra e impase ku a surgi. Den un karta ku mi a haña djarason 30 di sèptèmber di partido MPB, klaramente a keda pa mi,ku partido no tin konfiansa den mi persona. Nan no ta dispuesto pa purba na yega na otro, dor di pone poko awa serka e biña òf biña den awa, pa yega na un solushon òf rekonsiliashon. Pues despues ku mi a sinta kasi tres siman ku e polémika aki, mi a papia ku vários hende. Despues di e karta ku mi a risibí, ta notabel ku mi no ta bon bini mas den partido MPB. Mi no a buska kontakto ku niun miembro di partido. Mi a papia ku “votegetter” Nina den Heyer i e mes lo duna su deklarashon na e momentu oportuno. Partido òf miembronan di direktiva di partido MPB ta bisa ku nan a tuma e desishon den amplio konsenso ku diferente hende. Diferente hende ménos ami. Mi ta haña esaki hopi straño i sin rèspèt, ku ta tuma un desishon di tal índole, sin konsulta ku ami, i usa mi salú komo rason pa a tuma e desishon. Buskando informashon serka otro hende pafó, sin nunka puntra mi persona, relashoná ku e desishon ku a tuma, sin puntra kon nos por sigui, konta ku mi salu i mas. Den e karta ku ta manda ayera ta bolbe bisa ku a buska informashon amplio serka dòkternan, i hendenan ku tabatin malesa igual ku loke mi tabatin, i mi pregunta ta: kon ta bai ku informashon priva di hende asina otro kaminda? Tin hopi kos ku na mi konsepto por kana mihó. Hende kontentu òf no kontentu, esei mi ta haña un denominashon hopi suphetivo. No ta tur loke ta bon pa ami ta bon pa un otro. Momentu mi a djòin partido MPB, mi a hasié pasobra tabatin algun prinsipio, i mi a sintimi kómodo ku e tim. Mirando e puntonan e tempu aya, mi a bisa esaki ta tim korekto pa mi djòin i yuda mi hinka mi skouder na bienestar di Boneiru pa trese un kambio. Poulatinamente mi a tuma nota ku kosnan no tabata kana 100 porshento manera ami tabata deseá. Tin hende tin miedu di sali papia. Si no hasi esaki, nos no ta drecha loke no ta kana bon. Mi ta un hende ku gusta habri boka i puntra, i kisas awor mi tin ku paga e konsekuensia. Kisas mi a habri boka bisa muchu kos ku no tabata na agrado pa a papia públikamente. Sinembargo na mi konsepto, si nos a sinta na mesa pa yega na un komprondementu ku otro i si tabatin deseo nos lo a yega bon komprondementu”, Daisy Coffie a menshoná.

El a sigui bisa:” Mi intenshon ta pa sirbi pueblo di Boneiru sinta riba e stul independiente mas tantu posibel. Mi ta sinti ku di e forma aki mi por hasié mihó, kompará ku si mi lo a keda den un frakshon ku no tin e konfiansa den mi. Pa e próksimo 2 aña i mei binidero, pueblo di Boneiru por konta ku mi, pa atendé tur loke ta na bienestar di Boneiru. Mi lo ta un konsehal sumamente kritiko, riba e forma kon ta hiba polítika. Mi no ta bai sinta man krusa manera nada no a pasa. E meta ta ku tur e situashon aktual, mi tabata sintimi na kas serka MPB. Mi ta spera kisas durante e temporada binidero, kisas kosnan kambia, mi no ta deskartá dependé kon e situashon ta, i si MPB ta deseá, lo mi por regresá Partido polítiko MPB”, Daisy Coffie a bisa.

Share This
error: Content is protected !!