Kralendijk – Marian Luinstra Passhier, dòkter di Salubridat Públiko a papia tokante e situashon di Corona vírùs na Boneiru.   

“Na Boneiru nos a keda un temporada largu sin hende infektá ku Corona vírùs. Fin di ougùstùs esaki a yega su final, momentu nos a haña kasonan di hende infektá ku e vírùs. Den e di dos siman di sèptèmber e kantidat a oumentá. Komo ku den e wikènt di 19 di sèptèmber a resultá ku den un periodo kòrtiku, hopi resultado positivo a drenta, nos a implementá e medidanan riba 21 di sèptèmber. 

E siman tras di lomba nos a traha duru na departamentu di Salubridat Públiko, pa analisá e kasonan di hende infektá ku a tuma lugá entre 11 i 19 di sèptèmber, ekstensivamente dor di hasi entre otro investigashon di fuente i kontakto. Mi ke wak bèk ku boso riba e desaroyonan den e periodo aki i kon e vírùs a plama den e siman ku a pasa. 

For di 11 di sèptèmber nos a hasi mas ku 2000 (mil) tèst na e departamentu di Salubridat Públiko, di kua 113 tabatin un resultado positivo. A hospitalisá un total di 7 persona i 2 di nan a fayesé. Afortunadamente entre tantu tin hende ta rekuperá tambe. 

A trasladá un di e personanan ku tabata hospitalisá, pa CMC na Kòrsou. Fundashon Mariadal a pone personal, aparato i remedi èkstra na disposishon i por brinda kuido intensivo na pashèntnan di CoViD-19. Tòg ta wak kontinuamente serka kada pashènt ku CoViD-19, unda e por haña mihó kuido na e momentu ei. Tin biaha traslado ta deseá, por ehèmpel, pasobra e pashènt ta rekerí un sierto spesialismo médiko òf tratamentu médiko, ku aki no ta optenibel riba e nivel di ICU. Den un kaso asina por trasladá e pashènt pa un hòspital, ku nos ta traha kuné, na Kòrsou òf Aruba. 

Te ku 19 di sèptèmber tabatin solamente un kantidat chikitu di infekshon nobo pa dia. Riba 19 di sèptèmber e spantu a bin na momentu ku 16 hende tabatin resultado positivo riba 1 dia. Dor di esaki Boneiru a drenta den un situashon total nobo. Esaki a nifiká ‘alle hens aan dek’ pa alkansá tur e hendenan, pone nan den isolashon i pa start e investigashon di fuente i kontakto. Na mes momentu nos a kuminsá reuní ku vários partido pa konsehá Gezaghèber tokante kiko e kantidat grandi di infekshon aki lo a nifiká pa Boneiru. For di esaki e medidanan di 21 di sèptèmber a resultá i nos análisis di e simannan ku a pasa, tabata e base pa e konseho na Gezaghèber tokante e medidanan nobo.

E vírùs a aparesé rònt mundu, i na Boneiru tambe. Ta ferwagt ku Corona vírùs ta keda entre nos pa largu tempu. Sinembargo ta keda na nos pa biba ku otro di manera ku nos ta mantené e kantidat di hende infektá ku e vírùs ménos posibel. Pa kòrta su paso di un manera ku tòg nos por sigui ku nos bida. Esaki por dor di mantené nos mes na e medidanan: mantené sufisiente distansia, tosa den bo èlebog, laba bo man regularmente. I si bo tin keho: keda kas i yama e departamentu di Salubridat Públiko na 0800 0800 pa hasi un tèst”, Marian Luinstra Passhier a bisa. 

 

Share This
error: Content is protected !!