KRALENDIJK – Gezaghèber Edison Rijna resientemente a menshona: “Covid-19 ta na Boneiru i mester siña biba kuné. Ta responsabilidat di kada hende pa mantené nan mes na e medidanan”, el a bisa.

”E medidanan ta dirigí riba sierto sektornan manera: horeka ku no tin kontagio di e vírùs a tuma lugá. Si tur hende mantené nan mes na e reglanan, lo no tin kontagio manera ta e kaso den e otro sektornan. Pues e mensahe ta keda pa mantené distansia sosial, mantené medidanan di higiena ya asina nos por habri, i tin mas aktividat den nos ekonomia. Nos no ta hasi esaki pa solamente ekonomia. Salubridat públiko ta e ophetivo primordial di nos, sinembargo mester por duna kaminda no tin e kontagio e oportunidat pa nan por habri a base di kondishonnan estrikto i kondishonnan pone pa salubridat públiko kon pa sirbi nan. Ta na kada un pa mantené nan mes na e reglanan, mi ta hasi un apelashon na kada un su responsabilidat propio i nan sentido sifiko.

Ta bai tin kontròl di polis na diferente sitio. Ta tuma medida fuerte si no sigui ku e reglanan, i ta spera no yega asina leu. Mester sigui ku e reglanan nobo. E situashon no ta bai kambia pa awor. Si no kumpli ku e reglanan, tin but i kastigu di prison mara n’e. Si un instansia no kumpli ku regla, nos por ser’é pa un kantidat di dia i si e ripití, por yega asina leu ku ta kita pèrmit di e negoshi. Hopi biaha no ta e negoshi ta esun ku no ta kumpli ku e regla. Ta e kliente ta esnan ku ta komportá nan inkorekto. Hopi bia esnan ku ta kontrolá momentu ku nan ta presentá na e sitio, tur kos ta kana segun regla, momentu ku nan bai for di e sitio, kos ta desviá i bai fo’i òrdu. Nos mester kuminsá kambia nos mentalidat i ku nos mes tin ku tuma nos responsabilidat i realisá kiko nos ta hasiendo ku nos salubridat i esnan di nos ser kerí. E kontròl ta kontinuá i kaminda ta nesesario ta parti but. Mantené nos mes na e reglanan pa evitá ku nos ta hasi daño na nos mes hendenan i ku tur e konsekuensianan pa despues nos lamentá”, gezaghèber Rijna a bisa.

Share This
error: Content is protected !!