KRALENDIJK – Marian Luinstra Passhier, dòkter di Salubridat Públiko a papia tokante e prekupashon di mayornan relashoná ku e kasonan di Corona vírùs na Boneiru. “Mi ke pone èkstra énfasis un ratu riba e preokupashon ku ta reina bou di mayor i dosentenan na skol. Nos ta komprondé ku bo ta spantá ora bo tende ku un mucha na bo yu su skol tin resultado positivo di CoViD-19. No tin hopi mucha ku resultado positivo, sinembargo tin si. Nan tur a keda infektá den situashon di kas òf privá i no na skol. E muchanan tur tin síntoma di malesa, leve. Nan ta na kas. Serka kada alumno nos ta hasi investigashon di fuente i kontakto ekstensivo. Si ta nesesario, e departamentu di Salubridat Públiko ta tuma kontakto ku nan mihó amigunan ku ken nan tin hopi kontakto. Si ta nesesario, nan ta bai den karentena, maske e chèns di infekshon pa nan tambe ta chikitu. Esaki ta pa protehá otro muchanan, pa asina keda seif pa skol. Nos ta pone hopi atenshon na esaki. 

Mucha ta ménos suseptibel pa e vírùs, i si nan keda infektá, hopi biaha nan no ta bira malu òf nan ta haña síntoma hopi leve. Si mucha tin e vírùs, nan ta konsiderablemente ménos kontagioso pa adultonan. Dor di esaki e riesgo di infekshon na skol, ta konsiderablemente mas abou ku por ehèmpel na trabou. E vírùs a aparesé rònt mundu, i na Boneiru tambe. Ta ferwagt ku Corona vírùs ta keda entre nos pa largu tempu. Sinembargo ta keda na nos pa biba ku otro di manera ku nos ta mantené e kantidat di hende infektá ku e vírùs ménos posibel. Pa kòrta su paso di un manera ku tòg nos por sigui ku nos bida. Esaki por dor di mantené nos mes na e medidanan: mantené sufisiente distansia, tosa den bo èlebog, laba bo man regularmente. I si bo tin keho: keda kas i yama e departamentu di Salubridat Públiko na 0800 0800 pa hasi un tèst.”

Share This
error: Content is protected !!