KRALENDIJK – Segun Mario “Bòlòshi” Soliano den entrevista ku nos redaktor deportivo Ibi Piar e siman aki, a bisa ku e asuntu di gymnan ku no por habri aktualmente relashoná ku Covid-19, tin su persona hopi prekupá.
Riba nos pregunta kua ta e motibu di prekupashon, sr. Soliano di “Mario Soliano’s Gym”, a bisa ku bia pasá e la keda tres luna ku su gym será, esaki sin entrada sin nada pa kubri e gastunan ku e la hañé konfrontá kuné, sin sa unda e kue pa ayudo ku e situashon ku a presentá, loke a nifiká pèrdida pa su persona.

E ke trese bon kla dilanti pa tur hende skucha pa loke ta e parti di sentro di gym ku e asuntu di covid-19. E gym mester tin aire liber, di kua e sentro di gym di su persona tin 8 bentana, 1 porta grandi i dos porta mas. Ke men aire liber. Mester tene kompashon ku e gymnan ku tin aire liber. Si bo tin por ehèmpel 100 hende, puntra nan ki ora nan por trein, ki dia i ki manera por yega na un areglo pa por trein sikiera 1 ora pa e gym por sigui drai. Awor den situashon di COVID-19 ta pidi pa keda saludabel i den moveshon pero ta dal gymnan sera.

Awó a dal gym sera, pero tin ku tene kompashon ku esun ku tin ku paga e hür di su edifisio, otro gastunan adishonal di awa i koriente etc. Tin hende no ta bai pidi koperashon i no tin kompashon ku nan Gym ta será, ta bo asuntu, wak pa mi haña mi sèn fin di luna. Tur luna e debe di hür ta sigui subi i yega dado momentu ku no tin entrada mas i tin ku dal gym su portanan sera.

Si bo dal bo gym sera ku e kayente aki i tera ku ta yena e lugá, ta tur kos ta bai pèrdí, loke ta otro problema mas. Ta difísil p’abo dal bo portanan di gym sera snòk snòk. Tin tambe ku si bo habri pa aire pasa den e lugá o pa hasi limpi, nèt a pasa kontrolá, ta pensa ku ta habrí bo gym ta, loke no ta e kaso.
E situashon ta unu fèrfelu i difísil. Laga nos spera kiko i kon lo bai sigui ku e situashon aki.

Nos ta kere sinseramente ku lo mester tin solushon i koperashon pa esaki pa tòg e sentronan di gym funshoná manera sr. Soliano a trese dilanti, esta habri sierto oranan pa sierto grupo por trein pa evitá e aglomerashon di hende riba otro. Nos ta kere ku tur kos por.
Ta papia tin ku papia i yega na entendimentu ku otro, loke ku lo mester por.

Share This
error: Content is protected !!