KRALENDIJK – Dos bewaker ku tabata traha riba e tereno di Fundashon Kuido pa Personanan Desabilitá (FKPD) a keda kondená pa motibu ku nan a tene relashon seksual ku un habitante na aña 2016. Esaki a sosodé vários bia bou di ora di trabou. Ministerio Públiko a akusá e hòmbernan Juan A.C. i Francis R.

Anteriormente un otro bewaker tambe a keda kondená pa esaki. E víktima ta un dama di 21 aña ku un defisiensia den su desaroyo. Pues esaki ta nifiká ku ounke e dama tin 21 aña, e ta pensa manera un mucha di 9 aña. Segun e akusashonnan, e hòmbernan tabata slùip i drenta e kliente su kamber mei anochi, hasi sèks kuné i bai lag’é. A trata e dama komo un prostituta. Segun 2 empleado ku a testiguá, e akusadonan tabata den kamber di e víktima ku porta na lòk.

E bewaker nan a haña un kastigu di respektivamente 10 luna di kua 5 kondishonal i 8 luna di kua 4 kondishonal mas un periodo di prueba pa tur dos di 3 aña. Tantu fiskal komo hues a haña e komportashon aki repudiabel pa motibu ku un bewaker mester sòru pa seguridat di e habitantenan i no por abusá di e situashon. No ta pòrnada ku e klientenan di FKPD ta biba bou di guía i mester wòrdu protehá. Tur dos e bewakernan a keda retirá for di e kompania ku nan tabata traha p’e.

Share This
error: Content is protected !!