KRALENDIJK – USIBO saliendo for di e punto di bista ku outoridat ta esun ku tin ku tuma medida, pero alabes tin ku ehekutá e mantenshon di e medidanan akompañá ku sanshonnan ora violá esakinan USIBO a proponé lo siguiente. Mirando ku e medidanan klásiko pa evitá e plamamentu di e pandemia aki ta enserá higiena i mantenshon di distansia sosial, gobièrnu mester traha un tabèl den kua ta indiká kuantu hende pareu por ta presente riba kuantu meter kuadrá di un lokalidat. Den esaki ya nos a indiká ku un ehèmpel di e klasnan kaminda muchanan lo tin ku sigui haña lès. E mesun prinsipio aki por uza den e sektornan komersial tambe. Na momentu ku tur hende konosé e tabèl, nan sa tambe kuantu persona ta pèrmisibel den e lokalidat(nan) ku nan ta manehá. Ku esei nan por tuma e medidanan apropiá pa ehekutá e medidanan diktá hasiendo mínimo daño na nan operashon diario.

Tambe USIBO ta boga pa gezaghèber splika ku uzo di tapa boka ta obligatorio i/o rekomendabel. Nos por maginá nos ku den espasionan será uzo di e tapa boka ta altamente rekomendabel. Pa e kòntròl, USIBO ta kere ku por traha diferente tim di taskforce den kua por lo ménos tin un miembro ku outoridat polisial. Por uza e taskforce-nan aki pa krea empleo i/o pa laga esnan ku ta na kas awor aki hasi un trabou útil. Spesialmente den arianan públiko manera entre otro playanan e kòntròl aki ta sumamente rekomendabel no pa stòp aktividat di rekreo pero pa rekordá e hendenan riba mantenshon di e distansia sosial

Share This
error: Content is protected !!