KRALENDIJK – USIBO ta kontentu ku den e ordenansa di emergensia nobo a tene kuenta ku nos pensamentunan ku no ta nesesario pa lock down nos ekonomia, pero ku a laga espasio pa kada ken karga nan responsabilidat i pa ta kreativo den aplikashon di e medidanan i alkansá e metanan di higiena i distansia sosial pa evitá plamamentu di e Covid 19. Si tin gastunan adishonal mester kuantifiká esaki i wak ta ken tin ku karga nan.

Analisando e ordenansa mas aleu, USIBO ta pidi atenshon speshal ainda pa e parti di enseñansa ku apesar ku a kumpli ku e medidanan di higiena, ainda nos ta preokupá pa ku kumplimentu di e distansia sosial den e klasnan i speelplaats na nos skolnan. Mas aleu tambe USIBO ta kere ku mester analisá mas profundo e prohibishon pa praktiká deporte den nos stadion sin públiko. Nos ta kere ku aki tambe basá riba e prinsipio di kuantu hende por tin pareu riba x meter kuadrá di superfisie lo por permití den un forma responsabel públiko bishitá eventonan deportivo den stadion. Ademas esaki ta sirbi e meta di tin un salú mental i físiko komo fuente pa lanta resistensia kontra di e virus. Banda di esaki e ta sirbi tambe e meta pa distraishon di tantu fanátikonan den stadion, komo esnan na kas ku por sigui e evento via medianan sosial. Den e tempu di stress aki esaki ta un di e mihó remedinan.

Share This
error: Content is protected !!