KRALENDIJK – Ayera djamars anochi lat pa awe djarason mardugá un mal tempu inesperá a presentá spesialmente pa doñonan di boto chikitu. Ta trata di un kombinashon di áwaseru, bos, welek i bientu duru for di direkshon sùit west, sùit ost. Diferente boto ku tabata mará den bahia òf na wafnan di Kralendijk, a haña nan den problema i mester a los bai afó. Algun a bin resultá tambe na kosta. Diferente persona huntu ku outoridatnan polisial ku a tuma nota di botonan ku tabata yena ku awa, a duna un man, bahando den laman na kosta pa atendé ku e boto nan ku tabata den peliger. Kuerpo Polisial su lema i meta ta pa sirbi i protehá komunidat. Nan a demostrá tambe ayera ku nan tei pa sirbi komunidat ku nan ayudo i baha na laman brutu den ünifòrm sin niun problema.

E mal tempu tabata un sorpresa, debí ku e partisipashon di parti di KNMI a bai publisidat hopi lat. Ayera 11’or di anochi, ya e mal tempu a kuminsá ku spesialmente e parti di laman brutu i áwaseru, momentu ku e informashon di tempu di KNMI a keda publiká.

Na diferente okashon Radio Live 99.9 FM a trese e punto, referiendo ku KNMI ta informá hopi lat riba desaroyonan di tempu. Sinembargo no a hasi un adaptashon na e funshonamentu di informá komunidat di situashon di tempu adelantá. Awe mainta Radio Live 99.9 FM a tuma nota na malekon, tambe waf di piskadó playa pabou diferente plachi di palu a kita i piskadónan tabata saka nan for di fondo di laman, i pone nan riba e waf. Den playa pariba un yate a pega na kosta. Ta notabel kon boto nan a yena ku awa dor di e laman brutu.

Kombinashon di potrèt ta ilustrá parti di e situashon di loke a sosodé awe mardugá.         

Share This
error: Content is protected !!