KRALENDIJK – Direktiva di partido Movementu di Pueblo Boneriano (MPB) ke partisipá na prensa i pueblo en general ku entrante 30 sèptèmber 2020 sra. Daisy Coffie riba su propio desishon a disidí di tuma retiru komo miembro di MPB i na mes momentu deklará su mes komo miembro independiente den Konseho Insular. Esaki despues di un disputa komo direktiva a disidí pa remplasá sra. Coffie komo lider di frakshon den Konseho Insular.

Direktiva ta lamentá ku esaki mester a yega asina leu:

· E desishon di direktiva no tabata pa kita sra. Coffie for di su posishon komo miembro di Konseho Insular pero netamente pa yud’e ku su situashon personal di último lunanan,

· Filosofia di partido ta bisa bon klá ku miembronan di MPB no ta para ni pa puesto, ni poder, ni prestigio i ni plaka. Pero lo ta sirbidó di pueblo.

· MPB a bini for di komienso ta hasi kambionan pa duna oportunidat na su lidernan pa kue eksperensia i forma nan mes mas amplio.

Direktiva ta refutá enérgikamente tur akusashonnan vosiferá den prensa ku no tabatin konfiansa den, ni kontakto ku sra. Coffie durante su ousensia largu den eksterior i tambe ku lider polítiko no ta papia bèrdat. E último aki den un reunion interno ku sra. Coffie, direktiva i otro miembronan di Konseho Insular a konfrontá sra. Coffie i presentenan ku lider polítiko a papia bèrdat.

Direktiva ta deseá sra. Coffie komo miembro independiente den Konseho Insular éksito i sabiduria i ta spera ku e lo sa di duna su sosten pa gobernashon por sigui traha na un mihó Boneiru.

Direktiva awor ku e salida di sra. Coffie for di MPB ke enfatisá ku gobernashon ta kontinuá manera firmá ku e akuerdo di gobernashon entre e dos partidonan MPB i UPB, nos partner koalishon, ku un mayoria den Konseho Insular. Ta na demas miembronan den Konseho Insular basá riba nan konsenshi pa sostené puntonan di gobernashon den Konseho Insular.

I ku esaki direktiva ta pone un punto tras di e desaroyo aki, pa den tur trankilidat i ku hopi energia MPB huntu ku su partner den gobernashon lo sigui traha pa adelanto i bienestar di pueblo di Bonaire.

Atentamente Direktiva di partido Movementu di Pueblo Boneriano (MPB).

Cyrill Vrolijk, Presidente Suplente i Sanne Meijer, Sekretaria.

Share This
error: Content is protected !!