KRALENDIJK – Boneiru ya pa algun siman a drenta un fase nobo di desaroyo rondo di e coronavírùs. Durante e enkuentro ku prensa di siman pasá mi a splika boso kon e vírùs a plama na Boneiru den e periodo di 11 pa 27 di sèptèmber”, dòkter Marian Luinstra-Passchier a bisa. El a sigui bisa:” Naturalmente departamentu di Salubridat Públiko tabata okupá siman pasá tambe pa investigá i monitoriá situashon na nos isla. Mi ke duna boso un splikashon kòrtiku di e desaroyo di siman pasá. Nos por mira klaramente ku siman pasá tabatin pa dia konsiderablemente ménos hende ku a laga tèst nan mes pa dia, ku den e periodo anterior. Dos siman pasá un promedio di mas o ménos ochenta hende a laga tèst nan mes pa dia. Awor tin pa dia trinta pa kuarenta hende ta mèldu pa laga tèst nan mes, i e último dianan mas o ménos 20 pa dia.” 

“Un di e kosnan ku ta resaltá ta ku ta parse ku tin diariamente ménos kaso di hende ku a pega ku e vírùs ku den e simannan promé. Esei ta bon notisia, pero nos mester tene kuenta ku esaki no ke men nesesariamente ku awor nos ta yegando na fin. Resultado di e tèstnan ta prueba esei. Ta mas importante pa nos fiha nos bista riba kon e desaroyo ta bai, na lugá di wak e kantidat spesífiko di kaso pa dia. Nos ta ripará sí ku e promedio di kaso positivo pa dia a baha ku un promedio di dos pa dia. Nos ta spera ku esaki ta sigui asina. Sinembargo di otro un banda ta asina ku nos ta tèst konsiderablemente ménos. Den e grafik por mira kuantu resultado di tèst tabatin entre diesnuebe di sèptèmber i seis di òktober diariamente. Naturalmente por tin diferente motibu pa esaki. Por ta asina ku ménos hende tin keho ku tin di aber ku COVID-19. Den e kaso ei esei ta positivo, esei lo por nifiká ku en bèrdat nos tin ménos kaso di hende ku a pega ku e vírùs na Boneiru. Sinembargo por ta tambe, ku tin ménos hende ku ke pa nan tèst nan, pa ki motibu ku ta. Si esei ta e kaso, esei ke men ku nos no tin un bon bista di tur kaso di hende ku a pega ku e vírùs. Ta p’esei mi ke enkurashá bo un biaha mas : Bo tin keho? Yama 0800-0800 i laga nan tèst bo. 

“Kisas bo ta pensa, ai, ta djis un fèrkout mi tin, ta un dia so mi tin ku doló di garganta. Laga nan tèst bo tòg, pa nos por ta sigur ku bo no tin COVID-19. Òf kisas bo ta haña ku tèstmentu ta algu eksitante. 

Bo ta yama 0800 – 0800 i ta bisa ta ki keho bo tin. E ora ei nan ta hasi bo par di pregunta na telefòn. Moda ku departamento di Salubridat Públiko por monitoriá situashon na nos isla bon. E ora ei na telefòn bo ta traha un sita pa tèst, mayoria biaha e sita ta pa e siguiente dia mainta. Dia di e sita bo ta bai ku outo na e e lugá di tèst riba tereno di Salubridat Públiko, banda di stadion di Playa. Bisti un tapa boka ora di bai tèst i bai ku lensu di papel. Na e lugá di tèst nan ta splika bo kon ta hasi e tèst. Esaki ta dura par di minüt. 

Despues di e tèst bo ta bai stret bo kas. Bo no ta pasa na supermerkado, sinembargo bo ta bai un pasá kas. Despues bo ta keda kas te ora ku nan yama bo na kas ku e resultado. Esaki ta dura por lo general tres dia, tin biaha ménos. Si resultado di bo tèst ta negativo, bo tin mag di subi kaya atrobe i hasi loke normalmente bo sa hasi. Pero paga tinu: Si bo ta den karentena, e ora ei bo mester warda te fin di karentena. Mi ta duna mas detaye di esaki aweró. Si resultado di bo tèst ta positivo, un kolaboradó di Salubridat Públiko ta duna bo mas instrukshon na telefòn. E ora ei nos ta wak huntu ku ken bo tabatin kontakto i kuantu tempu bo mester keda kas”, dòkter Marian Luinstra-Passchier a bisa. 

Share This
error: Content is protected !!