KRALENDIJK – Dòkter Marian Luinstra-Passchier di e departamentu di salubridat públiko a splika resientemente kon kos ta bai ora ku un hende mester bai den karentena.

“Parse ku no ta tur hende sa kon esei ta bai. Karentena ta un periodo ku un hende ku ta salú ta isolá su mes despues ku e tabatin kontakto intensivo ku un hende ku a pega ku e vírùs. Ke men si un hende tabata na un distansia di ménos ku un meter i mei di un persona ku a pega ku e vírùs di corona, e persona ei mester keda kas. Mayoria biaha ta trata hende ku ta biba den mesun kas ku e persona ku a pega ku e vírùs, ke men hende grandi i mucha. Pa evitá ku e persona ei ta pega otro hende ku COVID-19 sin ku e sa ku e tin e malesa, e persona akí mester keda kas te ora ku durante dieskuater dia e no tabatin kontakto mas ku un hende ku tabatin COVID-19. 

KON LARGU MESTER KEDA DEN KARENTENA

Na momentu ku e departamentu di salubridat públiko yama un hende pa bisa ku e mester bai den karentena, nos ta wak kon largu e mester keda den karentena. Tin biaha esei ta pa par di dia, komo ku ta trata un kontakto di kasi dieskuater dia pasá. Den algun kaso mester keda mas ku dieskuater dia den karentena. Esei por ta por ehèmpel si e hende ainda tin kontakto ku un persona ku tin COVID-19, komo ku nan ta biba den mesun kas. Nos ta purba evitá esaki, pero esei no ta logra tur ora. Ke men en prinsipio karentena ta dura pues dieskuater dia, pero tin biaha e por ta mas òf ménos dia. Nos ta wak esei masha presis serka tur hende, pa nos tur por keda seif, i pa nos no tin nodi di laga hende keda kas sin ku ta na nodi. 

TÈST

Si durante karentena tin keho ku ta surgi, e persona por laga nan tèst e meskos ku tur hende. Ke men ku tèstmentu ta algu ku ta para lòs di karentena, sinembargo por tèst un hende tambe siendo ku e ta den karentena. Si bo ta den karentena i bo ta laga nan tèst bo, i e resultado ta negativo, bo mester keda kas tambe sobrá di e tempu di karentena. Resumiendo por nota ku e kantidat resultado di tèst positivo a baha siman pasá, esaki no opstante ku ayera tabatin hopi kaso nobo di hende ku a pega ku e vírùs. Esaki ta un señal positivo, pero nos no a yega ainda. Manera kos ta pinta nos ta kere ku e coronavírùs ta keda un tempu mas serka serka nos. Ta solamente si tur hende ku tin keho laga tèst nan mes, nos por haña un bista kla di e forma ku brote di e vírùs ta desaroyá na Boneiru. Sigui tene bo mes na reglanan di higiena i regla kon bo mester komportá bo mes. I si bo mester bai den karentena, tene bo mes na e reglanan di esei pa protehé bo mes i otro hende. Ta solamente huntu nos ta logra kombatí corona”, dòkter Marian Luinstra-Passchier a bisa. 

Share This
error: Content is protected !!