KRALENDIJK – Habitantenan di kaya Den Tera, e kaminda ku ta konektá ku kaya Neerlandia i Kaya Carlos A. Nicolaas, a lanta komienso di siman, i topa ku e situashon di e kaya kaminda nan ta biba, diripiente a kambia di nòmber. Funshonarionan di gobièrnu di Boneiru pa ta mas eksakto e direktorado R&O, a disidí di un dia pa otro pa kambia kaya Den Tera pa Kaya Tribon. A hasi esaki sin pone habitantenan na altura, pa asina atendé tur asuntu di kambio di adrès na banko, i tur otro instansia. Esaki tabata un baño di awa friu i un sorpresa.

Mesora algun habitante riba propio inisiativa, a tuma kontakto ku e departamentu di R&O, pa buska informashon i tende kua dia e desishon a kai, pa kambia nòmber di e kaya i si manda un karta pa avisá habitantenan. Funshonarionan di e departamentu no por a kontesta e preguntanan, i tabata para ariba, ku den pasado e kaya ya tabata karga e nòmber di kaya Tribon. Habitantenan a keda hopi desapuntá i rabia ku e situashon. Habitantenan ta di opinion ku e departamentu ta hopi brua e sistema ku nan ta traha. No por ta posibel, awe pa mayan ta yega i kambia nòmber di un kaya sin pone habitante na altura. Asina e departamentu ta disidí i hasi loke ku nan ke?

Finalmente despues ku a pasa 1 dia den diskushon ku un trahadó di e departamentu R&O i poniendo funshonarionan haltu na altura di e situashon, a mira ku a bin kambia nòmber di e kaya bèk pa kaya Den Tera. E habitantenan ta gradisí tur ku a pone man huntu pa e departamentu a pone nòmber di nan kaya bèk manera den pasado. Un mensahe ta bai na habitante di otro kayanan, paga tinu pa e tipo di akto manera a sosodé ya menshoná, ku ta kambia nòmber di nan kaya sin pone nan na altura, nan ta bisa.  

Share This
error: Content is protected !!