Kralendijk – Den un karta ku konsehal Daisy Coffie,  miembro independiente di Konseho Insular a manda pa  gezaghèber Edison Rijna, sra. Coffie ta alegá ku e karta di Rijna di 6 di òktober 2020 ku komo tópiko ‘Tratamentu parlamentario proposishon di lei Lei temporal medidanan Covid-19’ ta inapropiá, insólito i kontra tur regla di bon gobernashon. Segun sra. Coffie no a ked’é nada otro sino di yega na e konklushon aki.

“Na nòmber di Konseho Insular gezaghèber i grefir insular a firma e karta aki. Informashon ku mi ta disponé di dje ta mustra ku e karta di Tweede Kamer ‘Lei temporal medidanan Covid-19’ ya pa basta tempu kaba ta na Kolegio Ehekutivo i ta te djaluna 5 di òktober 2020 den presidio a añadí esaki na agènda pa tratamentu. A trata e karta den ousensia di lider di frakshon di Demkrat Clark Abraham i suskrito sra Daisy Coffie, kende for di 30 di sèptèmber 2020 formalmente a duna di konosé ku e no ke forma parti mas di frakshon di MPB, pero ku e lo kontinuá ku su trabounan komo frakshon independiente den Konseho Insular.’

Tambe konsehal Coffie ta trese dilanti ku na momentu di introdukshon di legislashon, kaminda e intenshon ta ku esaki ta vigente pa Hulanda Karibense tambe, konsulta ku gobièrnu di Boneiru ta nesesario òf a lo ménos deseabel. Bon toma di desishon ta eksigí por lo ménos ku ta tende Konseho Insular komo representashon di pueblo. Pa bon entendimentu: gobièrnu di Boneiru ta konsistí di gezaghèber, Kolegio Ehekutivo i Konseho Insular. Konseho Insular únikamente ta tuma desishonnan bálido, na momentu ku nan reuní públikamente i ku nan aprobá e desishonnan ku mayoria di voto. No por tuma ningun desishon, ni manda karta na nòmber di Konseho Insular sin tene kuenta ku regulashon i prosedura previo. Sigur gezaghèber, kende huntu ku otronan ta enkargá ku supervishon di kumplimentu ku bon gobernashon, bou di kua sin ningun duda e prosedura korekto den toma di desishon di parti di Konseho Insular tambe ta kai, mester sa i kumpli ku esaki.

‘Den e kaso aki na nòmber di Konseho Insular gezaghèber ta manda un karta tokante un tópiko, ku Konseho Insular no a tuma den tratamentu i tampoko gezaghèber a tende Konseho Insular tokante esaki, pero ku ta konsekuensia di algu ku a keda reglá den forma di ‘nos-ku-nos’ entre gezaghèber i dos lider di frakshon. Pa kolmo ta trata di un proposishon di lei ku ta afektá nos komunidat profundamente den su desaroyo sosial ekonómiko diario. Esaki ta insólito, inapropiá i intolerabel i por lo tantu mi ta desaprobá esaki fuertemente. E preshon di tempu pues por atribuí por kompleto na gezaghèber i na Kolegio Ehekutivo i no por ta un argumentu pa no sigui e proseduranan adekuá’, segun Daisy Coffie.

‘E aparensia ku gezaghèber ta krea serka Tweede Kamer i e komishonnan di Relashonnan den Reino i Hustisia i Siguridat ta engañoso. Esaki pasobra Konseho Insular no a tuma ningun desishon ku ta sostené gezaghèber su karta. Ni asta a tende Konseho Insular. Den kaso ku gezaghèber tin un otro opinion, mi ta supliká gezaghèber pa inmediatamente manda lo siguiente pa mi: 1. Konvokashon di reunion públiko, tantu di e reunion di forma opinion komo e reunion di tuma desishon ku komo punto di agènda ‘punto di bista di Konseho Insular relashoná ku Lei temporal medidanan di Covid-19’, 2. Lista di presensia di e reunionnan menshoná aki riba, 3. Nótulo di e deliberashonnan tokante esaki, si nan ta presente i 4. Resultado di votashon, si esaki a tuma lugá.’

‘Tambe ta posibel ku gezaghèber ta  referí na kualke artíkulo di lei di WOLBES, di Reglamentu di Òrden òf kualke otro ku gezaghèber ta basa su desishon pa manda e karta na nòmber di Konseho Insular riba dje. Por lo tantu e prosedura ku e lidernan di frakshon di UPB i MPB a sigui ku korespondensia via imeil pa griffier insular no ta korekto. Ta inkomprendibel alabes ku nos griffier insular mes no a koregí gezaghèber den esaki i a koperá ku e aktuashon inapropiá i insólito aki. P’esei den tur honestidat nos ta puntra nos mes si gezaghèber a hasi sufisiente esfuerso pa buska konseho pa sostené su manera di aktua. Pa e motibu aki nos lo pone e instansianan konserní na altura di nos punto di bista.’

Kopia di e karta di konsehal Daisy Coffie a bai pa presidente di Tweede Kamer, miembronan di komishon fiho di Asuntunan di Reino, miembronan di komishon Hustisia i Siguridat, miembronan di Konseho Insular di Boneiru, representante di reino i griffier Insular.

Share This
error: Content is protected !!