KRALENDIJK – Kapitan di haf, Gunther Flanigen despues di a risibi diferente pregunta, a duna un splikashon na miembronan di Konseho Insular relashoná ku e mal tempu ku a presentá inesperá pa doñonan di boto i kon e sistema ta funshoná.

“Na Boneiru tin un plan di kalamidat ku tur hende ta partisipá na dje. Esta polis, brantwer, Havenkantor, i wardakosta. Den e temporada di COVID-19 no tin wardakosta. Nan ta na Kòrsou e temporada aki. E sosten aktual riba laman ta esun di duana, i nan ta hasi kontròl. Esaki ta un espasio ku mester traha riba dje pa ser’é den futuro. Polis ta kontinuá ku e plan di kalamidat, kaminda nan ta yuda vários boto den nesesidat. Esei ta loke tin riba papel, i e ta funshoná. Atvertensia di KNMI nos a papi’é ku e piskadónan i diputado James Kroon i nan ta na altura di e situashon. KNMI ta un instituto di konosementu, i nan ta parti e konosementu i esun ku risibí esaki mester pasa e atvertensia. Pues e ta funshoná poko diferente for di meteo di Kòrsou. Nos a papia na vários okashon. Nan tin poko informashon i a pidi meteo di Kòrsou pa fasilidatnan informashon di e último 20 aña. Nan no a risibí e informashon pa nan por ‘update’ nan sistema. E otro kos ta ku no tin un kontròl riba laman tokante e situashon. Solamente na aeropuerto nan por kontrolá e situashon di tempu. Ta den deliberashon kaminda por kontrolá e parti di laman pa asina tin informashon rápido. Loke a sosodé djarason mardugá, Kòrsou a manda un atvertensia pa loke ta trata situashon di laman, pa diferente media. No solamente mi persona, sinembargo gezaghèber Edison Rijna tambe a tuma kontakto ku KNMI, i nan a informá ku Boneiru lo no tin problema.”  

KNMI TA INFORMA BONEIRU LAT DI MAL TEMPU 

“Mas anochi di djamars KNMI a informá ku posiblemente ta bai tin un mal tempu den área di Boneiru pa loke ta trata e parti di laman. Kasi un ora despues, KNMI a informá i konfirmá di e mal tempu. E momentu ei, mi a informá doñonan di boto pa medio di un grupo ku nos ta den riba telefon. E ora ei mi a bisa nan pa tuma nota di e website di KNMI, kaminda nan ta duna atvertensia ku bientu ta bira riba 10 not, i e ta bin for di direkshon zùitwèst. Momentu KNMI a duna e atvertensia, denter di mei ora e situashon a presentá. Mi a informá nos hende nan pa atendé ku e boto i tira bista na malekon pa wak si tin hende den nesesidat di ayudo. Nan a informámi ku polis i duana tabata yudando algun persona ku boto. E hendenan a hiba nan boto yachthaven loke nos a informá tambe e doñonan di e sitio.”  

KMNI I KORSOU TA TRAHA HUNTU.

“KNMI i meteo di Kòrsou ya tin 2 aña trahando huntu, riba entre otro informashon ku ta importante, i pa sierto instrumènt ku Kòrsou mes tin. Nos a pidi instrumènt pa Boneiru pa e parti di informashon bira mihó, i KNMI ta dispuesto pa kumpli ku diferente aparato pa midi situashon di tempu aki. KNMI ta trahando pa drecha nan modèl, i e úniko manera ku nan a pensa, na lugá di paga otronan pa midi situashon di bientu, nan ta bai instalá kámara na diferente sitio, pa nan por monitòr kon e situashon di tempu ta. Si tur kos kana manera plania, esta bon kontakto ku Kòrsou, aparato na Boneiru i video pa nan por wak, nan por duna e atvertensia mas trempan, kontrali na loke a sosodé e siman aki, kaminda e informashon a yega mei ora promé ku e mal tempu a presentá na Boneiru. Diferente grupo ya a sinta huntu kaminda a papia entre otro di un página spesial pa duna informashon i mas. Ta spera pronto tur kos ta kla i pa ehekutá esaki”, havenmeester Gunther Flanigen a bisa. 

Share This
error: Content is protected !!