KRALENDIJK – Irsais e hòmber di e kantika mundialmente komentá ‘Dream Girl’, tabata invitado den entrevista awe ku Aimed Ayubi.

“Mi ta traha sin ansha, resa na Dios i tur kos ta yega na su momentu. Ku 19 aña mi a bai Hulanda for di Boneiru. Aya mi a siña kon atendé ku e parti di produkshon. Skol a yudami hopi pa mi a desaroyá loke mi tabata gusta komo hòbi. Mi a kuminsá na Hulanda ku agrupashon musikal ‘Cache Royale’, miéntras mi tabata bai skol. Ma keda 2 pa 3 aña den ‘Cache’. Mi a duna tur ku tin i a sali ku un bon pensamentu for di e agrupashon musikal. Mi a wak riba hendenan lokal entre otro di ‘Cache’, pa mi a desaroyá loke mi tabata deseá. Despues di ‘Cache Royale’ mi a bai riba mi mes i a inisiá Ir-sais. Dios ta manda tur kos nèt nèt na e momentu korekto. Kere den dje tur kos ta kana bon na su debido tempu. No solamente bo trabou, sinembargo den tur kos tin su temporada i na final tin bunita regalo pa nos tur. Mi ta kanta i dominá diferente instrumènt musikal. Kitara ta mi instrumènt preferí, sinembargo mi no por tok’é. Aktualmente mi ta mas konsentrá riba e parti di produkshon. E sistema eléktriko ta e kos ku aktualmente ta hopi gusta, i mi ta konsentrá den e direkshon aki.  

E hit di momentu ‘Dream Girl’ ta kanando bon i a impaktá e mundu di músika. ‘TikTok’ ta un plataforma hopi gusta, sinembargo e kos a kuminsá ku ‘Snapchat’. Den tres dia mi bida a kambia kon nan a kue e video i plama e kos ei tur kaminda riba media sosial. Mi a drenta den tòp na Chile. Aya mi a konosé mi mènedjer i otronan. Entre otro negoshashon nan ku ‘Sony’ ta kanando. Mi a keda para pa e idioma papiamentu. Promé bia algu asina ta sosodé den tur e islanan Aruba, Boneiru i Kòrsou.  

Aktualmente mi ta na Boneiru pa bai hasi diferente grabashon. Mi a bai un kurso na Boneiru serka Boi Antoin, pa asina haña lès di Boneiru, pa mi tin mas informashon di pasado, loke ta hopi importante den loke mi ta hasi. Ku Amor di Dios mi ta bai hasi kos na Boneiru. Ya tin diferente kos plania pa 2021. Mi tin diferente kos plania pa Suisa, Merka i mas. Mucha hòmber di Tera Kòrá, Nort di saliña ta sigui saka kara di Boneiru. Mi lo ta na Boneiru algun siman mas. Ku positivismo bo ta yega mundu kompletu. Mi ta sigui lucha pa mi mes, mi famia, Boneiru i tur otro. Nos tur ta igual”, IrSais a bisa.  

Share This
error: Content is protected !!