KRALENDIJK – Djabièrnè anochi pa kue djasabra mardugá, polis tabata basta aktivo riba nos isla. Esaki pa wak si kaminda tin aglomerashon di hende, ku ta sigui e regla di distansiamentu sosial. Tur esaki pa yuda kombatí e vírùs di corona.

Manera ya a bira un kustumber, tur wikènt spesialmente fin di luna hendenan ta aglomerá na snèknan òf formando grupo pa sinta huntu i dal ‘drinks’ na kualkier sitio. Aparte di esei outoridatnan ta konstatá ku konstantemente ta pone fever riba karetera públiko pa tur presente mira. Den e pandemia di Covid-19 no tabata diferente. Ounke gezaghèber di Boneiru a bini ku diferente medida, tòg esaki a keda tuma lugá. Esei a pone ku outoridatnan a subi kaya i na diferente sitio a plama grupo di hende. Polisnan a bishitá tambe un adrès den e bario di Belnem despues di e risibí tep ku tin un fiesta tumando lugá lat di mardugá kousando molèster di zonido pa besiñanan. Na yegada di outoridatnan a bin topa ku un fiesta ku kantidat di Ulandes Oropeo na e adrès i ku no tabata mantené nan mes na reglanan vigente. Ta papia di sigur mas ku 30 persona ku tabata na e adrès. Esei a pone ku mesora outoridatnan a para e fiesta i kore ku tur hende mirando ku ta kousando molèster di zonido i e grupo no tabata mantené nan mes na medidanan eksistente di EBT. Asina a pasa kontrolá diferente sitio mas durante e anochi. No tin duda ku e tipo di kòntròlnan aki lo sigui i lo no basila pa plama gruponan grandi na kualkier sitio si no ta respetá medidanan.

Importante pa abo komo suidadano yuda si bo mira kualke situashon kaminda no ta kumpli ku medidanan eksistente pa no duda i mèldu polis mesora na 911. Huntu nos por gana e bataya kontra Covid-19.

Share This
error: Content is protected !!