KRALENDIJK – Awe djamars mardugá un bia mas Boneiru ta hañ’é ku sorpresa den mardugá, kaminda resak a pèrkurá pa diferente boto a bin pega riba kosta. E sistema di resak, esta laman ta bira brutu, a presentá mardugá. 25 pa 3 di mardugá KNMI a manda promé atvertensia, i 20 pasa di 4 a manda e di dos atvertensia, i ya na e momentu ei, tabatin diferente boto tirá na kosta ku forsa di laman. Un areá ku bastante wer a krusa riba nos isla for di direkshon sùit. Na momentu ku e areá aki tabata alkansando, e direkshon di bientu ku tabata generalmente ost, a kambia bira sùit. Mas aleu velosidat di bientu a oumentá di 16 km/o pa mas o menos 35 km/o.
Pa e motibunan aki e kondishon di laman a bira bastante brutu.

Hopi hende a presentá na kosta pa duna un man, yuda e diferente doño di botonan ku nan boto tabata den problema, debí na e laman brutu. Un biaha mas e atvertensia di KNMI a yega lat serka doñonan di boto. No ta promé biaha i loke a sosodé awe mardugá, ta igual na loke a pasa algun dia pasá den un siman di tempu. Simplemente no tabatin niun aviso trempan relashoná ku e resak ku a presentá. Presidente di Piskabon Ernst Delanoy ayera a papia na Radio Live 99.9 FM netamente tokante e situashon aki, kaminda el a mustra bon kla ku añanan a pasa i no a hasi nada pa mehorá e situashon di informashon. E situashon ta hopi di atenshon pa evitá destrukshon di boto òf un piskadó por topa ku situashon fastioso riba laman, ku tur e konsekuensianan.    

       

Share This
error: Content is protected !!