KRALENDIJK – Despues di hopi preshon i diskushon den komunidat, informashon ta yega i nada no a sosodé. Ayera djarason despues ku pa hopi tempu tin malkontentu e forma kon ta atendé ku informashon di mal tempu na Boneiru, atvertensia a drenta di KNMI den oranan di atardi via ‘whatsapp’ pa tene kuenta ku entre otro bientu ta bai kambia mardugá di djarason. E mensahe via ‘whatsapp’ a bai tambe pa piskadónan. Sinembargo mas lat ta drenta un otro informashon di gobièrnu di Boneiru ku ta bisa algu diferente ku esun di KNMI:   

“Atvertensia pa bientu fuerte i awa seru 

Esaki ta un atvertensia pa mal tempu ku por yega Boneiru djárason 14 di òktober 2020 pa djaweps 15 di òktober 2020. Espesial doñonan di boto tin ku tene kuenta ku laman brutu. Bientu por bini di sùit i lo bira 10 kònòpi. Esaki por trese olanan haltu. Djamars mardugá bientu fuerte ku a lanta di ripiente a sòru pa olanan haltu. Esaki a sòru pa basta molèster pa doñonan di boto. P’esei ta atvertí pa e mal tempu ku ta na kaminda.” 

Esnan konserní ku ta kore riesgo pa keda perhudiká, a hasi tur posibel pa pone tur kos na òrdu, pa evitá kualke desaster. Nada a sosodé. Un anochi trankil. Danki Dios, pasobra niun hende ta deseá niun tipo di mal tempu. Sinembargo e pregunta ta keda: Si di bèrdat por konfia informashon di KNMI. Awe mardugá bon ku nada no a sosodé, sinembargo ayera mardugá ku no a informá tabatin mal tempu. Pues kon ta bai sigui den futuro? Nan ta bai informá korektamente òf e informashon no ta konfiabel? Ora nan informá no ta sosodé nada i momentu ku tin mal tempu, nan no ta informá. Informashon di gobièrnu di Boneiru si ta kuadra òf nò?

Share This
error: Content is protected !!