KRALENDIJK – Ernst Delanoy presidente di Piskabon a bisa ku piskadónan a eksperensia 2 mal tempu den menos ku 1 siman i niun gobernante a duna atenshon na loke a sosodé.  “Apesar di tur gritu ku piskadónan a konstatá, debí na mal tempu algun dia pasa, hopi problema ku nan boto i waf destruí no a mira presensia di diputadonan. Botonan a bai den Jachthaven debí na e situashon, sinembargo momentu ku mal tempu pasa, mester saka boto for di aya, pasobra sino mester paga 10 dòler piku pa anochi pa e boto ta stashoná aya. Esaki no por, pasobra tin palabrashon hasí entre havenmeester i Harbour Village Marina. Pa loke ta trata e asuntu di waf di piskadónan esaki no ta na òrdu. Gran parti di e palunan ku ta pegá riba e waf debí na e mal tempu, a kita i bai fòndu. Esnan konserní no a duna atenshon pa drecha loke a daña. Pues piskadónan no por hasi un so di dje. Ta bon pa gobièrnu tuma nota i atendé e situashon. E asuntu di Jachthaven tambe ta unu ku ta rekerí atenshon, pasobra ta bai tin mas momentu ku boto nan tin ku bai skonde pa laman brutu. Por komprondé ku tin mandatario ta kana ku regularidat riba malekon, sinembargo e dianan aki no a mir’é. Mester yega na un solushon rápido i strukturá. E no mester ta asina ku e piskadó mester kai na rudia i roga pa yudansa.  

Otro kos, despues di hopi mal kontentu tokante informashon relashoná ku mal tempu na Boneiru, KNMI a manda 2 aviso i nada no a sosodé. Hopi informashon nunka ta di mas. Pero a menshoná algu i e mal tempu no a presentá, sinembargo no ta un problema. Ta kos ku por sosodé. loke si ta importante, pa e informashon ta konfiabel. Mester komprondé ku si e informashon no ta konfiabel, e piskadó ta keda sin subi laman pa motibu ku supuestamente laman ta bira brutu i pèrdè su pan di kada dia”, Delanoy a bisa. 

Share This
error: Content is protected !!