KRALENDIJK – Den un karta na gezaghèber Edison Rijna, Konsehal independiente Daisy Coffie ta mustra su prekupashon pa e forma kon STINAPA ta atendé ku tiramentu di kabritu den parke Washington-Slaagbaai i ta puntra tokante e pèrmitnan konserní pa tira kabritu i dikon no ta hunta e kabritunan, hiba nan matadero i usa nan komo alimento pa nos hendenan. Tambe e konsehal ke sa si tin un maneho relashoná ku kriamentu di kabritu aki na Boneiru. Segun informashon tiramentu di kabritu ta tuma lugá ora ku tin bishitante den e parke i ta indiká esaki ku un bandera kòrá anto ku e bishitante ta drenta riba propio riesgo den parke i sra Coffie ta suponé ku ta avisá bishitantenan tambe ku tin tiramentu. Relashoná ku esaki sra Coffie ta puntra si gobièrnu ta na altura di e manera di operá aki, si gobièrnu ta di akuerdo i ta aprobá e manera di operá aki i si gobièrnu no ta di akuerdo, kiko ta e pasonan ku Gobièrnu ta dispuesto pa tuma?

Na final di su karta Daisy Coffie ta indiká di ke duna un kontribushon tambe na e situashon aki. E konsehal ta kere ku ta difísil pa kaba ku tur kabritu den Slagbaai, pero tambe ku mester kontrolá e kantidat di kabritu. Esaki ta bon pa e mondi ku ta fuente di kuminda pa e bestianan i esaki ta bon pa e kabritunan tambe. Mas salú e mondi ta mas salú e kabritunan tambe ta. Pa kontrolá e kantidat di kabritu sra Coffie ta proponé un sistema kaminda ta duna un tipo di lisensia na esnan ku ke kue kabritu den Slagbaai. Naturalmente un lisensia asina mester ta mará na regla p.e. kon ta kue kabritu, ki ora ta kue kabritu, kon ta atendé ku e kabritu pero tambe ku e mondi. Asina STINAPA Bonaire por tin kontròl riba e situashon i e kuementu di kabritu. Esaki tin mas bentaha tambe: E hendenan por haña kabritu pa nan kome. Ta evitá hòrtamentu di kabritu. STINAPA Bonaire por tin kontròl riba kuantu kabritu ta saka for di Slagbaai. E mondi por kue forsa i asina tin mas alimento pa e bestianan. Por evitá tiramentu ku tur konsekuensia ku esaki por tin.

Terminando su karta Daisy Coffie ta skirbi ku e ta spera ku Gobièrnu ta usa su influensia pa atendé e asuntu aki promé ku insidentenan lamentabel sosodé.

Share This
error: Content is protected !!