KRALENDIJK – Fin di siman tras di lomba, Iron Order Bonaire a hasi donashon di hèrmènt na un hóben di 20 aña. Ta trata di un klup di koredónan di motosaikel. Resientemente e hóben Andruw Clappers a pèrdè un kantidat di hèrmènt ku e ta uza diariamente pa ehersé su trabou komo elèktrishèn. E tabata den e área di e molina na entrada pa bai Sorobon Beach, i algun antisosial a destruí su outo i a bai ku tur hèrmènt ku tabata den e outo. E famia a konta ku nan tabata kana den e área menshoná, esaki durante dia i a sospechá un vehíkulo ku a pasa nan ku hopi velosidat, momentu ku nan tabata kanando ku un distansia for di e outo, ku e hèrmènt nan aden. Momentu ku nan a regresá nan outo, a bin topa kuné destruí i tur hèrmènt a disparsé.   

Esaki a pone ku e hóben Andruw Clappers no por kontinuá ku su trabou di tur dia, pa gana su pan di kada dia. E famia a keda hopi desapuntá ku loke a sosodé.  

Iron Order Bonaire a tende loke a sosodé. Komo organisashon, un di nan metanan ta pa yuda hende den nesesidat. Nan a invitá Andruw na nan sentro kaminda nan ta reuní, i a sorprendé ku diferente kaha di hèrmènt nobo pa e ehersé su trabou. Poko despues un di esnan presente, a tende ku e ta bon den atendé ku koriente i pintamentu di mapa, nan a ofresé un trabou, loke el a apresiá. Despues ku Andruw a tuma loke miembronan di Iron Order Bonaire a entreg’é, el a ekspresá for di su kurason loke nan a hasi pe.

“Hopi danki na Iron Order Bonaire pa e donashon. Sin e hèrmèntnan mi no por hasi niun trabou i di otro banda, ta difísil pa mi yega na hèrmènt nobo, debí na e asuntu di COVID-19. Esnan ku a hòrta mi hèrmèntnan, no sa nifikashon i balor ku nan tin pa e doño. Mundu ta rondó”, Andruw a bisa. Riba potrèt momento algun di e miembronan di Iron Order Bonaire, a hasi entrega di diferente kaha ku hèrmènt nobo.  

Share This
error: Content is protected !!