KRALENDIJK – E hóben piskadó ‘Bul’ Silberie no ta kontentu e forma ku agentenan di KMar ta atendé ku nan komo doño di boto. “Ta parse ku nos komo doño di boto i piskadó no tin libertat. Ya ta di 2 bia ku ta sosodé ku KMar ta presentá na waf di piskadó na Playa Pabou i ta aktua komo si fuera ta algu ilegal ta sosodé na e sitio. Mi por djis menshoná nòmber di un otro piskadó ku tambe ta na e sitio, Jason Muller, i huntu nos ta hopi na e waf di piskadó. Simplemente nos tabata na e sitio pa wak kon e laman ta komportá, debí ku resientemente algu a sosodé i nos komo piskadó no tabata na altura i ku tur e konsekuensianan, momentu ku laman a bira brutu inesperá. Un pikòp di KMar a presentá na e sitio, i na mas okashon nan ta presentá i saka potrèt di e botonan.

E biaha aki nan a yega na e sitio i a tira klaridat di lus riba nos i a baha i aserká nos. Nos tabata 5 pèrsona. Un persona ku nan ta yama riba kaya ‘bieu’, a presentá serka nos huntu ku un ulandes Europeo. Nan a kuminsá pidi nòmber i sédula. Mi a kontestanan bisando: No ta posibel pa un hende bai laman òf sinta den libertat, kaminda nos tin nos boto? Mi a bisa nan ku ami no ta kla pa duna nòmber i aki nan ta menshoná; Si mi no bisa mi nòmber nan ta detenémi. Mi a bisanan nada malu no ta pasando i ta simplemente mi ta sinta wak mi boto. Nan a bisa si mi no ta sigui nan òrdu, nan ta yama mas patruya pa sosten, loke nan a hasi. Na tur nan a bira 4 persona ku a aserka nos pa posibel investigashon. Nan di si mi no duna nòmber nan ta detenémi. Mi a bisa nan mi no ta hasié. Mi ke mi trankilidat. Un di nan a menshoná mi nòmber, pues nan sa ken mi ta. Mi no ta hende ku ta bai prensa, sinembargo e kos aki a kuminsá molestiá hende. Si ke kontrolá, mester hasié tur kaminda, i no solamente na waf di piskadó na Playa Pabou. Nos no ta hasiendo nada inkorekto. Simplemente nos tabata wak e situashon di tempu, si laman ta bira brutu si òf no. Ami ta un di esnan ku konstantemente nan ta listra mi boto. No por obligá un hende pa duna su nòmber”, Bul Silberie a bisa.     

Share This
error: Content is protected !!