Kralendijk – Entidat Públiko Boneiru a disidí pa no laga e fiesta di yegada di Sanikolas na Boneiru tuma lugá e aña aki. Na lugá di esei ta bini un programa alternativo digital via kanalnan di televishon lokal i media sosial. For di e aña aki tambe e koló pretu di ‘piet’ ta disparsé for di tur yegada ofisial di den futuro.

Debí na e reglanan aktual pa evitá plamamentu di e vírùs di corona, no ta posibel pa laga e fiesta di yegada di e Hòmber Santu tuma lugá e aña aki. Diputado Nina den Heyer a trese esaki dilanti durante un reunion ku organisadónan di e yegada anual di Sanikolas i e spònser mas grandi di e evento.

Pa hopi aña kaba tin diskushon ta tuma lugá tokante ròl di ‘Zwarte Piet’ durante fiesta di Sanikolas. Esaki tantu na Boneiru komo den Reino. Un parti di nos pueblo ta mira ròl i aparensia di e pitnan ku koló pretu komo ofensivo i rasista. Esaki a bini dilanti durante kòmbersashon ku figuranan klave. Kolegio Ehekutivo ta haña importante pa tene kuenta ku e opinionnan aki. Ta importante pa organisá un fiesta ku grandi i chikí ta eksperensiá komo positivo i seif. Pa e motibu aki Kolegio Ehekutivo ke pa e adaptashonnan i kambionan tuma lugá paso pa paso na Boneiru.

Entrante e aña aki, koló di e pitnan ta bira otro. E pitnan ta haña diferente koló. No ta pèrmití pit ku koló pretu mas durante yegada ofisial di Sanikolas na Boneiru. Ta apliká e adaptashon aki den e programa alternativo tambe di e organisashon ‘We Do Entertainment’ ku ta organisá e yegada. Nan tin un alternativa pa tòg laga nos muchanan di Boneiru gosa di fiesta di Sanikolas. E aña aki, yegada di e Hòmber Santu lo bai ta di forma virtual ku un seri di programa na kanalnan di televishon lokal i riba media sosial. Esaki lo ta un boletin di Sanikolas transformá den un storia pa nos muchanan. Dentro di poko ta anunsiá mas informashon relashoná ku e programanan aki.

Share This
error: Content is protected !!